ក្រុមមន្រ្តីសុខាភិបាលប៉ាឡេស្ទីន និយាយថា កងកម្លាំងអ៊ីស្រាអែល បានបាញ់សម្លាប់បុរសជនប៉ាឡេស្ទីនម្នាក់នៅតាមព្រំដែនតំបន់កាន់កាប់ហ្គាហ្សាស្រ្ទីប-អ៊ីស្រាអែល កាលពីថ្ងៃអង្គារ ដែលជាករណីស្លាប់លើកដំបូងនៃការប្រឈមដាក់គ្នារាល់ថ្ងៃនៅតាមព្រំដែន ក្រោយស្ងប់ស្ងាត់អស់រយៈពេលជាច្រើនខែរួចមក ។

 យោធាអ៊ីស្រាអែល ពុំបានផ្តល់សេចក្តីអធិប្បាយភ្លាមៗនោះទេ ។ កាលពីរយៈពេលប៉ុន្មានសប្តាហ៍កន្លងមកនេះ ទាហានអ៊ីស្រាអែល ប្រើប្រាស់មធ្យោបាយបង្រ្កាបកុបកម្មលើជនប៉ាឡេស្ទីនដែលចោលគ្រឿងផ្ទុះមកលើរបងព្រំដែន ។

 ក្រុមមន្រ្តីសុខាភិបាលប៉ាឡេស្ទីន និយាយថា លោក Youssef Radwan វ័យ ២៥ឆ្នាំ រងការបាញ់ប្រហារត្រូវចំក. ហើយនិងបានស្លាប់នៅក្នុងមន្ទីរពេទ្យ ហើយមនុស្ស ១១នាក់ផ្សេងទៀត បានរងរបួស ។

 ក្រុមជីហាដហាម៉ាស់ ដែលជាក្រុមប្រដាប់អាវុធអ៊ីស្លាមគ្រប់គ្រងតំបន់ហ្គាហ្សាស្រ្ទីប បានគាំទ្រការតវ៉ានៅតាមព្រំដែនទាំងនេះ ។ 

ក្រុមអ្នករៀបចំការតវ៉ា និយាយកាលពីថ្ងៃអង្គារថា ពួកគេបាននាំគ្នាតវ៉ា ដើម្បីប្រឆាំងនឹងការធ្វើដំណើររបស់ជនជាតិជ្វីហ្វទៅកាន់បរិវេនព្រះវិហារ Al-Aqsa ស្ថិតនៅក្នុងទីក្រុងហ៊្សេរុយសាឡឹម ។

ការធ្វើបាតុកម្មផ្សេងទៀត ដើម្បីគាំទ្រដល់អ្នកទោសប៉ាឡេស្ទីនដែលជាប់ពន្ធនាគារនៅប្រទេសអ៊ីស្រាអែល ហើយនិងប្រឆាំងនឹងការបិទច្រកព្រំដែនចូលក្នុងដែនដីតំបន់ឆ្នេរដ៏តូចមួយនេះ ដែលមានជនប៉ាឡេស្ទីនប្រហែល ២,៣លាននាក់រស់នៅ ។

អ៊ីស្រាអែល និយាយថា ការបិទផ្លូវនេះ គឺចាំបាច់ដើម្បីបញ្ឈប់ការនាំចូលអាវុធដល់ក្រុមហាម៉ាស់ ដែលពួកគេធ្វើសង្រ្គាមជាមួយអស់រយៈពេលជាច្រើនលើកមកហើយ ចាប់តាំងពីក្រុមមួយនេះ រឹបអូសបានការគ្រប់គ្រងតំបន់ហ្គាហ្សា កាលពីឆ្នាំ ២០០៧ ពោលគឺរយៈពេល ២ឆ្នាំ ក្រោយពេលអ៊ីស្រាអែល ដកចេញអ្នកតាំងលំនៅនិគម ហើយនិងទាហានចេញពីតំបន់មួយនេះ ៕