ភ្នំពេញ៖ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល ថ្លែងថា ក្នុងសារលិខិតថ្លៃងក្នុងឱកាស «ទិវាសន្តិភាពអន្តរជាតិ» ( ២១ កញ្ញា ឆ្នាំ ២០២៣) សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានគូសបញ្ជាក់ថា រាជរដ្ឋាភិបាលនីតិកាលទី៧នៃរដ្ឋសភានឹងបន្តតម្កល់«សន្តិភាព»ជាគុណតម្លៃខ្ពស់បំផុត និងប្រកាន់ខ្ជាប់ពាក្យស្លោក«អរគុណសន្តិភាព» របស់សម្តេចអគ្គមហាសេនាបតីតេជោ ហ៊ុន សែន។ 

ឯកឧត្តមបន្តថា ការបន្តតម្កល់គុណតម្លៃ«សន្តិភាព»ជាអាទិភាពខ្ពស់បំផុតមានន័យស្មើនឹងការផ្តល់តម្លៃខ្ពស់បំផុតដល់សិទ្ធិជាមូលដ្ឋានរបស់ប្រជាពលរដ្ឋខ្មែរ គឺ«សិទ្ធិរស់រានមានជីវិត»។ 

ឯកឧត្តម ប៉ែន បូណា លើកឡើងថា បើក្រឡេកថយក្រោយបន្តិចទៅមើលអតីតកាលរបស់កម្ពុជា យើងគ្រប់គ្នានឹងបានយល់ច្បាស់អំពីតម្លៃសន្តិភាព។ ពិតណាស់ថា សម្រាប់ប្រទេសមួយដែលហែកហួរដោយភ្លើងសង្គ្រាម រហូតរអិលធ្លាក់ចូលក្នុងរបបប្រល័យពូជសាសន៍ដែលកាប់សម្លាប់ជីវិតមនុស្សគ្មានត្រាប្រណី និងបំផ្លាញខ្ទេចខ្ទីហេដ្ឋារចនាសម្ព័ន្ធសង្គម សេចក្តីត្រូវការដំបូងបំផុតគឺការរស់រានមានជីវិត។ 

ឯកឧត្តមបញ្ជាក់ថា ដោយគ្មានអ្នកអើពើក្នុងការជួយសង្គ្រោះខ្មែរចេញពីសេចក្តីស្លាប់ មានតែឥស្សរជនគណបក្សប្រជាជនកម្ពុជាទេក្នុងនោះមានសម្តេចតេជោ ហ៊ុន សែន ជាតួអង្គដ៏សំខាន់ម្នាក់ដែលបានចេញមុខតតាំងដណ្តើមជីវិតខ្មែរចេញពីចង្កូមមជ្ជុរាជ។ នោះហើយជាបេសកកម្មពិតប្រាកដដើម្បីសិទ្ធិជាមូលដ្ឋានរបស់ប្រជាពលរដ្ឋខ្មែរដោយយកជីវិតធ្វើដើមទុន។ 

បន្ទាប់ពីការសង្គ្រោះជីវិត កិច្ចការបន្ទាប់គឺការបង្កលក្ខណៈឲ្យប្រជាពលរដ្ឋមានចំណីអាហារបំពេញក្រពះ មានសម្លៀកបំពាក់បិទបាំងកាយ និងមានផ្ទះសម្បែងជ្រកកោន។ ដៃម្ខាងការពារមិនឲ្យរបបប្រល័យពូជសាសន៍វិលវិញ ដៃម្ខាងស្វែងរកសន្តិភាពរហូតសម្រេចបាននៅឆ្នាំ ១៩៩៨ តាមរយៈនយោបាយឈ្នះឈ្នះ។ នេះតាមើការបញ្ជាក់របស់ឯកឧត្តម ប៉ែន បូណា។ 

ឯកឧត្តមលើកឡើងថា សន្តិភាពនេះហើយដែលជាមូលដ្ឋានគ្រឹះនៃការអភិវឌ្ឍន៍។ ជាក់ស្តែង ពេលចេញពីរបបខ្មែរក្រហម រូបថតដែលសម្គាល់ប្រទេសកម្ពុជានិងប្រជាពលរដ្ឋខ្មែរគឺ អំពើកាប់សម្លាប់ ភាពក្រីក្រតោកយ៉ាក ពលរដ្ឋខ្មែរដែលស្គមកំព្រឹង ស្បែកដណ្តប់ឆ្អឹង សក់កន្ទ្រឿង អ្នកខ្លះមានតែខោគ្មានអាវ គ្មានស្បែកជើង ឈរបន្តកន្ទុយគ្នាចាំទទួលអំណោយស្បៀងអាហារ...។ ប៉ុន្តែ បច្ចុប្បន្ន រូបភាពទាំងនេះក្លាយជាអតីតកាលទៅហើយ។ ប្រជាពលរដ្ឋខ្មែរសម័យនេះមានភាពស៊ីវីឡាយមិនខុសពីពលរដ្ឋប្រទេសជិតខាងក្នុងតំបន់និងក្នុងពិភពលោកឡើយ។ រាជធានីភ្នំពេញក៏មិនចាញ់បាងកក ហុងកុង ឬសាំងហ្គាពួរ ប៉ុន្មានដែរ។ បើគ្មានសន្តិភាព អ្វីៗទាំងអស់នេះក៏មិនអាចកើតមានឡើយ។ 

ឯកឧត្តម ប៉ែន បូណា បន្តថា នេះគឺជាហេតុផលសត្យានុម័តដែលរាជរដ្ឋាភិបាលនីតិកាលទី៧ដឹកនាំដោយសម្តេចធិបតី ហ៊ុន ម៉ាណែត ត្រូវបន្តតម្កល់«សន្តិភាព»ជាគុណតម្លៃខ្ពស់បំផុតនិងបន្តប្រកាន់ខ្ជាប់នូវពាក្យស្លោក«អរគុណសន្តិភាព»ដែលបង្កើតឡើងដោយសម្តេចតេជោ ហ៊ុន សែន៕ ដោយ ៖ ដារ៉ា