​ប្រណាំង​កង់៖ ​កីឡាករ​​កូ​ឡុំ​ប៊ី Egan Bernal បាន​គ្រង​ជើងឯក​ព្រឹត្តិការណ៍​ប្រណាំង​កង់ Grand Tour, Giro d’Italia ដែលជា​ជើងឯក Grand Tour លើក​ទី២​។ ​កីឡាករ​របស់​ក្រុម​ប្រណាំង Ineos Grenadier រូបនេះ​បាន​នាំមុខគេ​ក្នុង​តារាង​វេលា​រួម​ច្រើន​ថ្ងៃ​មកហើយ មុននឹង​ឈានដល់​ដំណាក់កាល​ចុងក្រោយ​នៅ​ថ្ងៃអាទិត្យ​ម្សិលមិញ ​ដែលជា​ដំណាក់កាល​ប្រណាំង​យក​ថេរវេលា​ផ្ទាល់ខ្លួន​បញ្ចប់​នៅទីក្រុង Milan​។

​​លើ​កំណាត់​ផ្លូវ ៣០.៣​គីឡូម៉ែត្រកាលពី​ថ្ងៃអាទិត្យ​នោះ​ អ្នកឈ្នះ​គឺ​កីឡាករ​ម្ចាស់ផ្ទះ​អ៊ីតាលី Filippo Ganna ប្រើពេល ៣៣នាទី ៤៨វិនាទី​តាម​ពីក្រោយ​ដោយ​កីឡាករ​បារាំង Remi Cavagna ១២វិនាទី និង​លេខ៣ Edoardo Affini យឺត​ជាង ១៣វិនាទី​។ ​គូប្រជែង​របស់ Bernal គឺ​កីឡាករ​ម្ចាស់ផ្ទះ​អ៊ីតាលី Damiano Caruso ដែល​បាន​យកឈ្នះ​ដំណាក់កាល​ទី២០ កាលពី​ថ្ងៃអាទិត្យ ធ្វើ​មិន​បានល្អ​ឡើយ​ក្នុងដំណាក់កាល​ចុងក្រោយ ​ដោយ​បញ្ចប់​នៅ​ចំណាត់ថ្នាក់​លេខ ១៧​។ ​យ៉ាងណាក្តី Egan Bernal ដែលជា​ជើងឯក Tour de France កាលពី​ឆ្នាំ២០១៩ នោះនៅតែ​បញ្ចប់​លើ​គេ​ក្នុង​តារាង​រួម​ក្រោយ ២១ដំណាក់កាល​នេះ​ដោយមាន​វេលា​ល្អ​ជាង​អ្នក​លេខ២ Damiano Caruso ១នាទី ២៩វិនាទី និង​លេខ៣ កីឡាករ​អង់គ្លេស Simon Yates យឺត​ជាង ៤នាទី ១៥វិនាទី​។ ​ក្នុងនាម​ជា​ជើងឯក Giro d’Italia នេះ Egan Bernal ទទួលបាន​ប្រាក់រង្វាន់ ២៣ម៉ឺន​ផោន​៕

​អត្ថបទ​៖​នាង សុភា​វុ​ធ