ឥណ្ឌា ៖ ស្ថានអគ្គកុងស៊ុលប្រទេសឥណ្ឌាប្រចាំនៅទីក្រុងតូរ៉ុង់តូ បាននិយាយថា សេវាស្ថានកុងស៊ុលសម្រាប់ពលរដ្ឋឥណ្ឌានៅក្នុងប្រទេសកាណាដា នឹងបន្តដែលត្រូវបានបន្ថែមពេល។ ទន្ទឹមនឹងនេះ មន្ត្រីកាណាដា បានប្រាប់សារព័ត៌មានAPថា ពួកគេមានការស៊ើបការណ៍សម្ងាត់លើការជាប់ពាក់ព័ន្ធរបស់ប្រទេសឥណ្ឌាក្នុងការសម្លាប់មេដឹកនាំចលនាផ្តាច់ខ្លួន Khalistani ព្រមទាំងការស៊ើបការណ៍សម្ងាត់ពីសមាជិកនៃសម្ព័ន្ធភាព «Five Eyes» ។ នៅព្រឹកថ្ងៃនេះ ប្រទេសកាណាដាបាននិយាយថា សកម្មភាពឈ្លានពាន ស្អប់ខ្ពើម បំភិតបំភ័យ ឬការញុះញង់ឱ្យមានការភ័យខ្លាច ពុំមាននៅក្នុងប្រទេសនេះទេ ក្នុងពេលមានការចែករំលែកវីដេអូតាមបណ្តាញអ៊ីនធឺណិត ដែលថាពលរដ្ឋកាណាដាកាន់សាសនាហិណ្ឌូ ត្រូវបានប្រាប់ឱ្យចាកចេញពីប្រទេស។ មន្ត្រីកាណាដាម្នាក់ ដែលដឹងច្បាស់ពីស្ថានភាពនេះបានប្រាប់សារព័ត៌មានAP ថា ការចោទប្រកាន់ទាក់ទងនឹងការជាប់ពាក់ព័ន្ធដ៏មានសក្តានុពលរបស់ឥណ្ឌា ក្នុងការសម្លាប់អ្នកកាន់សាសនាស៊ីគ ជនជាតិកាណាដា គឺផ្អែកលើសកម្មភាពស៊ើបអង្កេតដែលធ្វើឡើងលើអ្នកការទូតឥណ្ឌានៅក្នុងប្រទេសកាណាដា។ ព័ត៌មាននេះរួមបញ្ចូលទាំងការស៊ើបការណ៍សម្ងាត់ដែលទទួលបានពីសម្ព័ន្ធមិត្តដ៏សំខាន់មួយនៅក្នុងសម្ព័ន្ធភាពចែករំលែកការស៊ើបការណ៍សម្ងាត់ «Five Eyes» រួមមានសហរដ្ឋអាមេរិក ចក្រភពអង់គ្លេស អូស្ត្រាលី នូវែលហ្សេឡង់ និងប្រទេសកាណាដា។ ក្នុងការឆ្លើយតបទៅនឹងការវិវឌ្ឍន៍ទាំងនេះ ឥណ្ឌាបានចាត់វិធានការដើម្បីបញ្ឈប់ការចេញទិដ្ឋាការដល់ពលរដ្ឋកាណាដា និងបានស្នើសុំកាត់បន្ថយបុគ្គលិកការទូតរបស់ប្រទេសកាណាដា។ ទំនាក់ទំនងរវាងប្រទេសទាំងពីរ បានឈានដល់ចំណុចទាបបំផុតក្នុងរយៈពេលប៉ុន្មានឆ្នាំមកនេះ បន្ទាប់ពីសេចក្តីថ្លែងការណ៍របស់នាយករដ្ឋមន្ត្រីកាណាដា លោក Justin Trudeau កាលពីថ្ងៃចន្ទទាក់ទងនឹង «ការចោទប្រកាន់ដ៏គួរឱ្យជឿជាក់» នៃការជាប់ពាក់ព័ន្ធរបស់ឥណ្ឌាក្នុងឃាតកម្មនេះ។