ក្រុមបាតុកររាប់ពាន់នាក់ បានជួបជុំគ្នានៅក្នុងរដ្ឋធានី Accra របស់ប្រទេសហ្គាណាកាលពីថ្ងៃសៅរ៍ អស់រយៈពេល ៣ថ្ងៃជាប់ៗគ្នា ដើម្បីតវ៉ាប្រឆាំងនឹងវិបត្តិសេដ្ឋកិច្ច ដែលនាំឲ្យមានការចាប់ខ្លួនមនុស្សរាប់សិបនាក់ ។
ក្រុមបាតុករដែលពួកគេមួយចំនួនមានកាន់បដា និងទង់ជាតិហ្គាណានោះ បានត្អូញត្អែរពីការឡើងថ្លៃការចំណាយ និងកង្វះខាតការងារ ស្របពេលដែលពួកគេដង្ហែក្បួនក្រោមការឃ្លាំមើលពីក្រុមនគរបាលបង្រ្កាបកុបកម្ម ។
គួរឲ្យដឹងថា ប្រទេសផលិតមាស ប្រេង និងដំណាំកាកាវមួយនេះ ស្ថិតក្នុងវិបត្តិសេដ្ឋកិច្ចដ៏អាក្រក់បំផុត ក្នុងជំនាន់មួយដែលបង្កឡើងដោយសារបំណុលរដ្ឋ ។
ក្រុមនគរបាល បានបិទផ្លូវដើម្បីរារាំងក្រុមបាតុករពីការធ្វើដំណើរទៅកាន់វិមានប្រធានាធិបតី ដែលក្រុមរៀបចំបាតុកម្មអះអាងថា ពួកគេប្តេជ្ញាកាន់កាប់ឲ្យទាល់តែបាន ។
កាលពីថ្ងៃព្រហស្បតិ៍កន្លងទៅ ក្រុមនគរបាលនិយាយថា ពួកគេបានឃាត់ខ្លួនមនុស្ស ៤៩នាក់ ដែលបានប្រមូលផ្តុំគ្នាខុសច្បាប់ និងបំពានលើច្បាប់សណ្តាប់ធ្លាប់សាធារណៈ នៅថ្ងៃដំបូងនៃបាតុកម្មរយៈពេល ៣ថ្ងៃនេះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
