ឯកឧត្តម អ៊ី ឈាន តំណាងរាស្រ្តមណ្ឌលខេត្តប៉ៃលិន និងជាប្រធាន​អនុគណៈកម្មការ​សាងសង់​ស្តូប​អនុស្សាវរី​យ៍នយោបាយឈ្នះ ឈ្នះប៉ៃលិន បានឲ្យដឹងថាស្តូបឈ្នះ ឈ្នះដែល​បាន​កំពុង​សាង​សង់​នា​ពេល​នេះ គឺបានជិត ៧០ភាគរយហើយ ខណៈស្តូបនេះ​នឹង​រួម​ចំណែក​យ៉ាង​សំខាន់​ក្នុង​ការ​លើក​កម្ពស់​ការអភិវឌ្ឍវិស័យទេសចរណ៍ នៅខេត្តប៉ៃលិនឲ្យកាន់តែច្រើនបន្ថែមទៀប បន្ទាប់​ពី​សាង​សង់​រួចជាស្ថាពរ។

ថ្លែងក្នុងកិច្ចសម្ភាសន៍ជាមួយទូរទស្សន៍BTV ឯកឧត្តមអ៊ី ឈាន បានឲ្យដឹងថា ស្តូប ឈ្នះ ឈ្នះ បាន​​ចាប់ផ្តើមសាងសង់កាលពីខែឧសភា ឆ្នាំ២០២២កន្លងទៅ ហើយការសាង សង់ស្តូបនេះឡើង គឺ​មាន​គោលបំណង ឲ្យក្លាយជាមជ្ឈមណ្ឌលវប្បធម៌សន្តិភាព ដើម្បីការអប់រំ តាំងពិព័រណ៍ តម្កល់​ភស្តុតាងនានា ឯកសារ ខ្លឹមសារប្រវត្តិសាស្រ្តពិត ស្តីពីនយោបាយឈ្នះ ឈ្នះ អំពី​រឿងរ៉ាវ​នៃ​វីរភាព​របស់​វីរជន​ស្នេហា​ជាតិ​ជាច្រើន ជាពិសេសប្រវត្តិសាស្រ្តរបស់សម្តេចហ៊ុន សែន អតីត​នាយករដ្ឋ​មន្រ្តី​កម្ពុជា និងជាបិតាសន្តិភាពរបស់កម្ពុជាតែម្តង ដែលលោក​បាន​លះ​បង់​សាច់​ស្រស់​ឈាម​ស្រស់ ដើម្បីបុព្វហេតុជាតិមាតុភូមិនោះ។ 

ឯកឧត្តម បានបញ្ជាក់បន្ថែមទៀតថា ស្តូបឈ្នះ ឈ្នះ ប៉ៃលិននេះ ពេលសាងសង់រួចនឹង ទទួល​បាន​ការ​គាំទ្រពីគ្រប់មជ្ឈដ្ឋាន ដែលជាការឆ្លើយតបទៅនឹងតម្រូវការចាំបាច់របស់ប្រជាពលរដ្ឋ ក្នុង​ការអភិវឌ្ឍវិស័យវប្បធម៌ ប្រវត្តិសាស្ត្រ ទេសចរណ៍ សេដ្ឋកិច្ច សង្គម និង​យុទ្ធ​សាស្ត្រ​បន្ថែម​ទៀត​ផង​ដែរ​។

 សូមបញ្ជាក់ថា ស្តូបអុស្សាវរីយ៍នយោបាយ ឈ្នះ ឈ្នះប៉ៃលិន មានទំហំផ្ទៃដី ៥៩ គុណនឹង៥៩ ម៉ែត្រ និងកម្ពស់ ៥០. ៩ ម៉ែត្រ,សាងសង់លើផ្ទៃដី ២៦០០០ ម៉ែត្រក្រឡា៕ អត្ថបទ៖ បាន ចក់