ភ្នំពេញ ៖មន្ត្រីជាន់ខ្ពស់កម្ពុជាអំពាវនាវអោយសហគ្រិនជាសមាជិកពិភពម៉ាឡាយូ ពិភពឥស្លាមទាំងអស់ចូលមកវិនិយោគនៅកម្ពុជាឱ្យបានច្រើន ខណះកម្ពុជាលើកទឹកចិត្តខ្ពស់ដល់វិនិយោគនានាដោយបើកចំហលើគ្រប់វិស័យ និងដោយគ្មានការរឹតបន្តឹងលើកម្មសិទ្ធិ។ ជាពិសេស កម្ពុជា ជាប្រទេសត្រូវបានលើកចិត្តដោយត្រូវចំណាយពន្ធទាប ក្នុងការនាំចេញផលិត ផលទៅតាមបណ្ដាប្រទេសនៅអឺរ៉ុប។

ការអំពាវនាវនេះក្នុង ខណៈឯកឧត្ដមទេសរដ្ឋមន្រ្តី អូស្មាន ហាស្សាន់ ក្នុងនាមជាប្រធាន DMDI កម្ពុជា អញ្ជើញបិទសន្និសីទពិភពម៉ាឡាយូ ពិភពឥស្លាម DMDI លើកទី២១ ដែលកម្ពុជាធ្វើជាម្ចាស់ផ្ទះ នៅសណ្ឋាគារភ្នំពេញពីថ្ងៃទី២២ ដល់២៥ ខែកញ្ញា ឆ្នាំ២០២៣នេះ ក្រោមប្រធានបទ «ការពង្រឹងសហគ្រិនភាពនៃសមាជិក DMDI និងដៃគូរនានា» និងមានវាគ្មិន១៧ រូបបានបកស្រាយទាក់ទងនឹងទិដ្ឋភាពសេដ្ឋ កិច្ច និងការអភិវឌ្ឍសេដ្ឋកិច្ច បង្ហាញដល់សមាជិក DMDI និងដៃគូរសហការនានា រាប់រយនាក់ដែលមកចូលរួមបាន ដឹងពីឱកាសល្អបំផុតដើម្បីបង្កើតចំណងបណ្តាញសេដ្ឋកិច្ច និងស្វែងរកនូវមធ្យោបាយនៃការបំលែងសេដ្ឋកិច្ចពិភពឌីជីថលដែលមានការបង្កើតថ្មី។

តាមរយៈសន្និសីទនេះ មានបណ្ដាអង្គការ សមាគម និងក្រុមហ៊ុនចំនួន២០ក្រុមហ៊ុនបានសម្រេចចុះMOUបណ្តាក់ទុនជាមួយគ្នា។ ដោយក្នុងនោះក្រុមហ៊ុន Bioscience ជា មួយក្រុមហ៊ុន KV Resources ផងដែរ ក្នុងគោល បំណងបង្កើតគម្រោងអភិវឌ្ឍន៌ក្នុងវិស័យបណ្តុះបណ្តាលលើផ្នែកផលិតចំណីអាហារ កសិកម្ម ពាណិជកម្ម អប់រំ ជាដើមមកប្រទេសកម្ពុជា។

លោក ឈួន សុវណ្ណសក្ក័ តំណាងឱ្យ Bioscience បានឱ្យដឹងថា Bioscience ធ្វើការផលិតផង ទទួលជួយដល់បណ្តាម្ចាស់ក្រុមហ៊ុនឬសហគ្រាសមកពីម៉ាឡេស៊ីដែលចង់បង្កើតឈ្មោះនិងបញ្ជីការនៅកម្ពុជា ព្រមទាំងជាក្រុមហ៊ុនធ្វើការនាំចេញចូលទំនិញផលិតផលចំណីអាហារជាច្រើនមុខរវាងកម្ពុជានិងម៉ាឡេស៊ីផងដែរ ។ រីឯ kv Resourceវិញគឺ ជារោងចក្រនិងជាក្រុមហ៊ុនដឹកជញ្ជូននៅប្រទេសម៉ាឡេស៊ី ព្រមទាំងជាអ្នកអូសទាញវិនិយោគិនពីម៉ាឡេស៊ី មកវិនិយោគទុននៅក្នុងប្រទេសកម្ពុជា។

ឆ្លើយតបតាមភាគីកម្ពុជា ឯកឧត្ដម Tun Seri Setia (Dr) Mohd Ali bin Mohd Rustam ប្រធានពិភពម៉ាឡាយូពិភពឥស្លាមបានប្រកាសគាំទ្រ និងជំរុញណិជ្ជករ ធុរជន សហគ្រិន DMDI សូមមកវិនិយោគនៅកម្ពុជាដោយមើលឃើញថា កម្ពុជាជាប្រទេសអំណោយផលលើវិស័យកសិកម្ម ឧស្សាហកម្ម និងវិស័យផ្សេងៗទៀត។ឯកឧត្ដម បានមានជំនឿថាសេដ្ឋកិច្ចកម្ពុជា នឹងមានកំណើនខ្លាំងនាពេលដ៏ខ្លីខាងមុខនេះ៕

អត្ថបទ ៖ ភារម្យ