លោកស្រី Alexandria Ocasio-Cortez បានចូលរួមក្នុងការអំពាវនាវឲ្យលោក Bob Menendez លាលែងពីតំណែង បន្ទាប់ពីសមាជិកព្រឹទ្ធសភារបស់គណបក្សប្រជាធិបតេយ្យមកពីរដ្ឋ New Jersey សហរដ្ឋអាមេរិក ត្រូវបានចោទប្រកាន់ពីបទទទួលយកដុំមាស រថយន្ត Mercedes-Benz និងអំណោយផ្សេងទៀតជាការស៊ូកប៉ាន់។

និយាយកាលពីថ្ងៃអាទិត្យចុងសប្ដាហ៍កន្លងមក លោកស្រី Ocasio-Cortez បាននិយាយថា ការចោទប្រកាន់លើលោក Menendez គឺករណី «ធ្ងន់ធ្ងរបំផុត» ហើយលោកគួរតែចុះចេញពីតំណែង។ ចំនួនសមាជិកនៃគណបក្សប្រជាធិបតេយ្យកាន់តែច្រើនឡើង កំពុងអំពាវនាវឲ្យលោក Menendez ដែលជាតំណាងរាស្ត្រពីរដ្ឋ New Jersey នៅក្នុងព្រឹទ្ធសភា តាំងពីឆ្នាំ២០០៦ មកនោះ លាលែងពីតំណែង។

សូមបញ្ជាក់ថា លោក Menendez ត្រូវបានចោទប្រកាន់ថា បានប្រើតួនាទីរបស់លោក ដើម្បីជួយសម្រួលដល់កិច្ចការរបស់រដ្ឋាភិបាលផ្តាច់ការអេហ្ស៊ីប និងបានដាក់សម្ពាធលើរដ្ឋអាជ្ញាសហព័ន្ធឲ្យទម្លាក់ចោលសំណុំរឿងប្រឆាំងមិត្តភ័ក្តិម្នាក់។

កាលពីចុងសប្តាហ៍កន្លងមក លោក John Fetterman បានក្លាយជាសមាជិកព្រឹទ្ធសភាអាមេរិកដំបូងគេមកពីគណបក្សប្រជាធិបតេយ្យ ដែលស្នើឲ្យលោក Menendez លាលែងពីតំណែង ខណៈដែលសមាជិកសភាមកពីរដ្ឋ New Jersey របស់គណបក្សប្រជាធិបតេយ្យ បានប្រកាសថា លោកនឹងឈរឈ្មោះប្រឆាំងនឹងលោក Menendez នៅក្នុងការបោះឆ្នោតសាកល្បង នាឆ្នាំក្រោយ។

ការលើកឡើងរបស់លោកស្រី Ocasio-Cortez ពាក់ព័ន្ធដល់លោក Menendez នេះ បានកើតឡើងបន្ទាប់ពីលោកស្រីបានអំពាវនាវឲ្យមានការស៊ើបអង្កេតសហព័ន្ធលើលោក Clarence Thomas ដែលជាចៅក្រមរបស់តុលាការកំពូលអភិរក្សនិយម ជុំវិញការទទួលយកអំណោយ ដែលមិនបានប្រកាសពីម្ចាស់ជំនួយពួកស្តាំនិយមដ៏មានទ្រព្យសម្បត្តិ៕