ទីប្រឹក្សាសន្តិសុខជាតិរបស់ប្រទេសហ្វីលីពីន នៅថ្ងៃចន្ទ (ទី២៥ ខែកញ្ញា) នេះ បានឲ្យដឹងថា ប្រទេសហ្វីលីពីននឹងចាត់វិធានការសមស្របទាំងអស់ ដើម្បីជំរុញឲ្យមានដករបាំងចេញពីតំបន់ជម្លោះនៃសមុទ្រចិនខាងត្បូង។

ប្រទេសហ្វីលីពីន កាលពីថ្ងៃអាទិត្យ (ទី២៤ ខែកញ្ញា) បានចែករំលែករូបភាពនៃរបាំងបណ្ដែតទឹក ដែលរារាំងការចូលរបស់នាវានេសាទ នៅតំបន់ថ្មប៉ប្រះទឹក ដោយមាននាវាឆ្មាំល្បាតឆ្នេរចិន នៅក្បែរនោះ ហើយបាននិយាយថា ខ្លួននឹងការពារសិទ្ធិនៃអ្នកនេសាទរបស់ខ្លួន។

ក្រសួងការបរទេសហ្វីលីពីន នៅថ្ងៃចន្ទនេះ បានលើកឡើងថា ការដាក់របាំងនេះ គឺជាអំពើបំពានច្បាប់អន្តរជាតិ ហើយថា ហ្វីលីពីននឹង «ចាត់វិធានការសមស្របទាំងអស់ ដើម្បីការពារអធិបតេយ្យភាពរបស់ប្រទេស និងជីវភាពរស់នៅរបស់អ្នកនេសាទទាំងអស់របស់យើង»។ ពាក់ព័ន្ធនឹងករណីនេះ ស្ថានទូតចិន ប្រចាំនៅទីក្រុងម៉ានីល មិនបានឆ្លើយតបនឹងសំណើសុំការអត្ថាធិប្បាយនោះទេ។

ប្រទេសចិនអះអាងសិទ្ធិអធិបតេយ្យភាព ៩០ភាគរយនៃសមុទ្រចិនខាងត្បូង ដោយត្រួតលើគ្នាជាមួយតំបន់សេដ្ឋកិច្ចផ្តាច់មុខរបស់ប្រទេសវៀតណាម ម៉ាឡេស៊ី ប្រ៊ុយណេ ឥណ្ឌូនេស៊ី និងហ្វីលីពីន។ ទីក្រុងប៉េកាំងបានរឹបអូសយកតំបន់ថ្មប៉ប្រះទឹក ក្នុងឆ្នាំ២០១២ ហើយបានជំរុញអ្នកនេសាទមកពីហ្វីលីពីនមិនឲ្យធ្វើដំណើរមកកាន់តំបន់នេះបន្ថែមទៀត ដើម្បីចាប់ត្រីតូចៗនោះឡើយ៕