ក្រសួងការបរទេស បាននិយាយកាលពីថ្ងៃចន្ទថា សហរដ្ឋអាមេរិក បានចុះហត្ថលេខាលើកិច្ចព្រមព្រៀងប្រាក់កម្ចីផ្ទាល់ចំនួន ពីរពាន់លានដុល្លារ ដើម្បីគាំទ្រដល់កម្មវិធីទំនើបកម្មផ្នែកការពារជាតិរបស់ប្រទេសប៉ូឡូញ។

កិច្ចព្រមព្រៀងផ្តល់ហិរញ្ញប្បទានយោធាបរទេសជំរុញកិច្ចសហប្រតិបត្តិការការពារជាតិរបស់ប្រទេសទាំងពីរ ខណៈដែលប៉ូឡូញ កំពុងស្វែងរកការជំរុញកងកម្លាំងប្រដាប់អាវុធរបស់ខ្លួន បន្ទាប់ពីការឈ្លានពាន របស់រុស្ស៊ីលើអ៊ុយក្រែន។

ក្រសួងការបរទេស បាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទថា៖«បន្ថែមពីលើតួនាទីគាំទ្រកណ្តាលរបស់ខ្លួនក្នុងការសម្របសម្រួលជំនួយអន្តរជាតិដល់ប្រទេសអ៊ុយក្រែនដែលនៅជិតខាង ប៉ូឡូញ បានបង្ហាញពីការប្តេជ្ញាចិត្តរបស់ខ្លួនក្នុងការពង្រឹងសន្តិសុខក្នុងតំបន់ តាមរយៈការវិនិយោគដ៏រឹងមាំរបស់ខ្លួន ក្នុងការចំណាយលើវិស័យការពារជាតិ»។

ប្រទេសប៉ូឡូញ គឺជាសម្ព័ន្ធមិត្តឈានមុខរបស់សហរដ្ឋអាមេរិក ហើយបានឈរនៅលើកំពូលតារាងចំណាយរបស់អង្គការណាតូ នៅឆ្នាំនេះ។ សម្ព័ន្ធភាពយោធានេះ បានព្យាករថា ប្រទេសប៉ូឡូញ នឹងផ្តល់ឲ្យ ៣,៩ភាគរយនៃផលិតផលក្នុងស្រុកសរុប ទៅក្នុងគោលដៅយោធា ដែលជិតស្មើពីរដងនៃគោលដៅពីរភាគរយបច្ចុប្បន្នរបស់អង្គការណាតូ។