ការបោះឆ្នោតនៅតំបន់ស្រយាល សម្រាប់ការធ្វើប្រជាមតិរបស់ប្រទេសអូស្ត្រាលី ដើម្បីទទួលស្គាល់ជនជាតិដើមរបស់ប្រទេសនេះ នៅក្នុងរដ្ឋធម្មនុញ្ញ បានចាប់ផ្តើម កាលពីថ្ងៃចន្ទ (ទី២៥ ខែកញ្ញា) មុនថ្ងៃបោះឆ្នោតថ្ងៃទី១៤ ខែតុលា។

ប្រជាជនអូស្ត្រាលីនឹងត្រូវបានស្នើឲ្យបោះឆ្នោតថា តើពួកគេគាំទ្រកំណែទម្រង់រដ្ឋធម្មនុញ្ញ ដើម្បីដាក់បញ្ចូល «សំឡេងរបស់ជនជាតិដើម ក្នុងសភា» ជាគណៈកម្មាធិការជនជាតិដើមមួយ ដែលនឹងផ្តល់យោបល់ដល់សភាសហព័ន្ធលើបញ្ហានានា ដែលប៉ះពាល់ដល់ជនជាតិដើម និងប្រជាជនកោះ Torres Strait។

គួរបញ្ជាក់ដែរថា ប្រជាជនអូស្ត្រាលីបានបោះឆ្នោតចុងក្រោយ នៅក្នុងប្រជាមតិអំពីជនជាតិដើមភាគតិចអូស្ត្រាលី ក្នុងឆ្នាំ១៩៦៧ ដែលប្រជាជន ៩០,៧៧ភាគរយ បានបោះឆ្នោតគាំទ្រការ ក្នុងការរួមបញ្ចូលជនជាតិដើមអូស្ត្រាលីនៅក្នុងតួលេខជំរឿន។

ប្រទេសអូស្ត្រាលីមិនមានសន្ធិសញ្ញាជាមួយជនជាតិដើមភាគតិចរបស់ខ្លួន ដែលមានចំនួនប្រហែល ៣,២ភាគរយនៃចំនួនប្រជាជនជិត ២៦លាននាក់នោះទេ។ ពួកគេមិនត្រូវបានគេលើកឡើងនៅក្នុងរដ្ឋធម្មនុញ្ញទេ ទោះបីជាអ្នករស់នៅលើទឹកដីនេះអស់រយៈពេលជាង ៦០.០០០ ឆ្នាំមកហើយ។

រាល់ការកែប្រែរដ្ឋធម្មនុញ្ញ ក្នុងប្រទេសអូស្ត្រាលី ទាមទារឲ្យមានប្រជាមតិជាតិ។ ការទទួលបានការផ្លាស់ប្តូររដ្ឋធម្មនុញ្ញ គឺជារឿងលំបាកណាស់ នៅអូស្ត្រាលី។ កន្លងមក មានសំណើចំនួន ៤៤ច្បាប់ សម្រាប់ការកែប្រែរដ្ឋធម្មនុញ្ញ ក្នុងការធ្វើប្រជាមតិចំនួន ១៩លើក ហើយមានតែ ៨លើកប៉ុណ្ណោះ ដែលទទួលបានការអនុម័ត៕