​បាល់ទាត់៖ អតីត​គ្រូ​បង្វឹក​ក្រុម​ជម្រើស​ជាតិ​កម្ពុជា លោក Lee Tae Hoon បាន​ត្រឡប់​មក​ប្រកប​អាជីព​នៅ​កម្ពុជា​វិញ​ហើយ បន្ទាប់ពី​ត្រូវ​សមាគម​កីឡាបាល់ទាត់​កង​យោធពល​ខេមរភូមិន្ទ ប្រកាស​តែង​តាំង​លោក​ជា​អ្នកចាត់ការ​ក្រុម​របស់​ខ្លួន ក្នុង​សន្និសីទ​សារព័ត៌មាននៅ​ព្រឹក​ថ្ងៃ​ទី​១ ខែ​មិថុនា ឆ្នាំ​២០២១ នេះ​នៅ​សណ្ឋាគារ​សូ​ហ្វី​តែ​ល។​

​សូម​បញ្ជាក់​ថា មុន​ត្រឡប់​មក​ប្រឡូក​អាជីព​ក្នុង​វិស័យ​បាល់ទាត់​នៅ​កម្ពុជា​វិញ គ្រូ​បង្វឹក​កូរ៉េខាងត្បូង​លោក Lee Tae Hoon បាន​ចំណាយ​ពេល ២​ឆ្នាំ​ជាមួយ​ក្លិប Hoang Anh Gia Lai – HAGL នៃ​លី​គ​កំពូល​វៀតណាម តែ​មិនសូវ​សមប្រកប​នោះ​ទេមុន​ត្រូវ​បាន​ក្លិប​សម្រេចចិត្ត ​ប្រកាស​ចែក​គ្នា​ជាមួយ​លោកកាលពី​ចុង​ឆ្នាំ​២០២០ កន្លងទៅ។​ យ៉ាងណាក្ដី អ្នកគាំទ្រ​នៅតែ​ចង់​ចាំ​លោក Lee Tae Hoon ជានិច្ច បន្ទាប់ពី​លោក​ធ្លាប់​ចំណាយ​ពេល​ជាង ៧​ឆ្នាំ​ជាមួយ​សហព័ន្ធ​កីឡាបាល់ទាត់​កម្ពុជា ពិសេស​ការ​ដឹក​នាំ​ក្រុម​ជម្រើស​ជាតិ​កម្ពុជា។ ដូច្នេះ​ការ​វិល​ត្រឡប់​នេះគេ​រំពឹង​ថា លោក Lee នឹង​ទទួល​បាន​ការ​គាំទ្រ និង​ស្វាគមន៍​យ៉ាង​កក់ក្ដៅ​ពី​អ្នកគាំទ្រ​កម្ពុជា ពិសេស​អ្នកគាំទ្រ​សមាគម​កីឡាបាល់ទាត់ ​កង​យោធពល​ខេ​ម​ភូមិន្ទ​ផ្ទាល់​តែម្ដង ៕

អត្ថបទ៖ លី ឈុន​ឡា