អាហ្វហ្គានីស្ថាន ៖ រយៈពេល ២ឆ្នាំកន្លងផុតទៅ ចាប់តាំងពីក្រុមតាលីបង់ដណ្តើមកាន់កាប់អំណាចនៅក្នុងប្រទេសអាហ្វហ្គានីស្ថាន ស្ថានភាពនៅក្នុងប្រទេសមួយនេះ ពុំល្អប្រសើរទាល់តែសោះ ពោលគឺមានតែធ្ងន់ធ្ងរខ្លាំងជាងមុន ទាំងស្ថានភាពមនុស្សធម៌ សិទ្ធិមនុស្ស សន្តិសុខសង្គម និងស្ថានភាពនយោបាយ ។ នេះបើយោងតាមការអះអាងរបស់លោក Naseer Faiq គឺជាមន្រ្តីទទួលបន្ទុកកិច្ចការនៅអាហ្វហ្គានីស្ថានរបស់អង្គការសហប្រជាជាតិ(UN) បញ្ជាក់ប្រាប់ក្រុមប្រឹក្សាសន្តិសុខ UN កាលពីថ្ងៃអង្គារ។ 

 លោកបានលើកឡើងថា អត្រាក្រីក្រនៅក្នុងប្រទេសអាហ្វហ្គានីស្ថាន មានចំនួនរហូតដល់ ៩៧ភាគរយ ហើយ ២ភាគ៣នៃប្រជាពលរដ្ឋ ពិបាករស់រាន ។ 

 លោក Faiq បន្តថា ភាពអត់ឃ្លានបានធ្វើឲ្យប៉ះពាល់ដល់មនុស្ស ១៥លាននាក់នៅក្នុងប្រទេសអាហ្វហ្គានីស្ថាន ខណៈដែលអត្រាគ្មានការងារធ្វើ បានកើនឡើង ហើយការធ្វើចំណាកស្រុកនៅតែបន្ត បើទោះបីជាមានហានិភ័យខ្ពស់ក៏ដោយ ។ 

 លោកថា ក្រោមការគ្រប់គ្រងរបស់ក្រុមតាលីបង់ ស្ថានភាពសង្គមនៅក្នុងប្រទេសមួយនេះ នៅតែបន្តដុនដាបខ្លាំង ។ សិទ្ធិសេរីភាពរបស់ស្រ្តី ហើយនិងសហគមន៍ងាយរងគ្រោះ បានរងផលប៉ះពាល់យ៉ាងធ្ងន់ធ្ងរ ។ ស្រ្តី និងក្មេងស្រី ប្រឈមនឹងការរឹតត្បិតយ៉ាងតឹងរឹងបំផុតលើការបំលាស់ទីរបស់ពួកគេ ការទទួលបានការអប់រំ ហើយនិងការចូលរួមនៅក្នុងសង្គម ។ 

 ដោយឡែក លោក Robert Wood គឺជាឯកអគ្គរដ្ឋទូតរងសហរដ្ឋអាមេរិកប្រចាំនៅ UN និយាយថា សហរដ្ឋអាមេរិក ដែលបានកាន់កាប់ប្រទេសមួយនេះអស់រយៈពេល ២ទសវត្សរ៍ បានចាត់ទុកការសម្លាប់ ការឃុំឃាំងដោយខុសច្បាប់ ការបំពានលើរាងកាយ ការព្យាបាលជំងឺ និងការបាត់ខ្លួនរបស់អតីតមន្រ្តីរដ្ឋាភិបាលនៅក្នុងក្រសួងការពារជាតិអាហ្វហ្គានីស្ថាន គឺជារឿងដែលពុំអាចទទួលយកបាននោះទេ ៕