ភ្នំពេញ ៖ អភិបាលរាជធានីភ្នំពេញបានណែនាំឱ្យអាជ្ញាធរខណ្ឌ និងគណៈកម្មការផ្សារតដ្ឋទាំង២៥ផ្សារត្រូវថែរក្សាសន្តិសុខសណ្ដាប់ធ្នាប់ និងបរិស្ថានផ្សារឱ្យបានល្អប្រសើរ និងយកចិត្តទុកដាក់លើជីវភាពរស់នៅរបស់អាជីវករ។

ថ្លែងក្នុងកិច្ចប្រជុំពង្រឹងការងារគ្រប់គ្រងផ្សារក្នុងរាជធានីភ្នំពេញ ជាមួយអាជ្ញាធរខណ្ឌទាំង១៤ និងប្រធានគណៈកម្មការផ្សាររដ្ឋទាំង២៥ នារសៀលថ្ងៃទី២៧ ខែកញ្ញា ឆ្នាំ២០២៣ នៅសាលារាជធានីភ្នំពេញ អភិបាលរាជធានីភ្នំពេញ ឯកឧត្តម ឃួង ស្រេង បានណែនាំឱ្យប្រធានគណៈកម្មការផ្សាររដ្ឋទាំង២៥នៅរាជធានីភ្នំពេញ យកចិត្តទុកដាក់លើការថែរក្សាសន្តិសុខ សណ្ដាប់ធ្នាប់ និងបរិស្ថាននៅជុំវិញ និងក្នុងផ្សារ ហើយអ្វីដែលសំខាន់មួយទៀតនោះ គឺគណៈកម្មការផ្សារត្រូវមានភាពស្និតស្នាលរ៉ាក់ទាក់ជាមួយអាជីវករក្នុង និងក្រៅប្រព័ន្ធ ។

ឯកឧត្តម ឃួង ស្រេង បានមានប្រសាសន៍ថា ប្រធានគណៈកម្មការផ្សារត្រូវមើលឱ្យគ្រប់ជ្រុងជ្រោយនៅក្នុងផ្សារដែលខ្លួនគ្រប់គ្រងទាំងជីវភាពរស់នៅរបស់អាជីវករជាមួយនឹងការធ្វើស្ថិតិឱ្យបានច្បាស់លាស់ចំពោះអាជីវករដែលមានជីវភាពខ្វះខាត និងមធ្យម ដើម្បីងាយស្រួលថែទាំពួកគាត់ ។ បន្ថែមពីនេះត្រូវណែនាំប្រជាពលរដ្ឋ និងអាជីវករ ថែរក្សាអនាម័យ បរិស្ថាននៅក្នុងផ្សារជាប្រចាំ។

ឯកឧត្តម ឃួង ស្រង ក៏បានជំរុញឱ្យពិនិត្យឱ្យបានម៉ត់ចត់ជុំវិញការមិនយកប្រាក់ពីអាជីវករលក់តាមកញ្ច្រែងល្អី ជាមួយនិងការរកទីតាំងឱ្យពួកគាត់បានលក់ដូរ និងការបញ្ចុះតម្លៃទឹក ភ្លើង នៅតាមទីផ្សារទៅតាមកំណត់របស់រាជរដ្ឋាភិបាល។ ការងារនេះ ទាំងអាជ្ញាធរ ទាំងគណៈកម្មការផ្សារត្រូវពិនិត្យឱ្យបានម៉ត់ចត់។ ក្នុងនាមជាអាណាព្យាបាលប្រជាពលរដ្ឋ អាជ្ញាធរខណ្ឌទាំង១៤ និងគណៈកម្មការផ្សាររដ្ឋទាំង២៥ ត្រូវធ្វើយ៉ាងណាឱ្យប្រជាពលរដ្ឋ និងអាជីវករគោរពស្រលាញ់ឱ្យបានយូអង្វែង៕ អត្ថបទ ៖ ប្រាក់ វ៉ាន់ដា