សហព័ន្ធកីឡាបាល់ទាត់ទួកគីបានបង្ហាញមុខផ្លូវការ គ្រូបង្គោលក្រុមជម្រើសជាតិថ្មីលោក Vincenzo Montella នៅថ្ងៃពុធម្សិលមិញនេះ។

អតីតខ្សែប្រយុទ្ធអ៊ីតាលី Vincenzo Montella ត្រូវបាន​ប្រកាសតែង​តាំង​ឱ្យ​ដឹកនាំ​ក្រុម​ជម្រើស​ជាតិ​ទួកគី​នៅថ្ងៃព្រហស្បតិ៍សប្តាហ៍មុន បន្ទាប់ពីការចាកចេញរបស់គ្រូបង្វឹកសញ្ជាតិអាល្លឺម៉ង់ Stefan Kuntz។

លោក Stefan Kuntz ត្រូវ​បាន​សហព័ន្ធ​បាល់ទាត់​ទួកគី​បញ្ចប់​តំណែង​ក្រោយ​ទទួល​រង​ការ​រិះគន់​ខ្លាំង​ពី​បរាជ័យក្រោមថ្វីជើងជប៉ុន ៤-២ លក្ខណៈមិត្តភាព។

ទួកគីក្លាយជាក្រុមជម្រើសជាតិទី ២ ដែលដកតំណែងគ្រូបង្វឹកក្រោយចាញ់ជប៉ុន បន្ទាប់ពី​អាល្លឺម៉ង់​ក៏​បានដកតំណែងគ្រូបង្វឹក Hansi Flick ដែរក្រោយចាញ់ជប៉ុន ៤-១ ក្នុង​ជំនួប​មិត្ត​ភាព​កាល​ពី​សប្តាហ៍មុន។

ទួកគីបានខកខានបង្ហាញខ្លួននៅ World Cup តាំងពីឆ្នាំ ២០០២ តែ​កំពុង​ស្ថិត​ក្នុង​ចំណាត់​ថ្នាក់​ល្អ​ក្នុង​ការប្រកួតជម្រុះ Euro 2024។

ចំណែកឯលោក Vincenzo Montella បច្ចុប្បន្នវ័យ ៤៩ ឆ្នាំ ធ្លាប់​ចំណាយ​ពេល​ដឹក​នាំ​ក្លិប​អាជីព​នៅ​ទឹក​ដីទួកគីផងដែរគឺដឹកនាំក្រុម Adana Demirspor រយៈពេល ២ ឆ្នាំ មុន​ពេល​ចែក​ផ្លូវ​គ្នា​កាល​ពី​ខែមិថុនាកន្លងទៅ។

លោក Montella ក៏ធ្លាប់ដឹកក្លិបធំៗនៅអ៊ីតាលីផងដែររួមមាន AC Milan និង Fiorentina ក៏​ដូច​ជា​ធ្លាប់​ដឹកនាំក្លិបអេស្ប៉ាញ Sevilla។

មកដល់ទឹកដីទួកគីនេះ Montella បានចុះហត្ថលេខាងដឹកនាំក្រុមជម្រើសជាតិ ៣ ឆ្នាំ៕ អត្ថបទ៖នាង សុភាវុធ