រដ្ឋមន្រ្តីការពារជាតិសហរដ្ឋអាមេរិកលោក Lloyd Austin បានបញ្ចប់ដំណើរទស្សនកិច្ចរបស់លោកនៅប្រទេសអង់ហ្គោឡា កាលពីថ្ងៃពុធ ដោយលោកនិយាយថា ជោគជ័យនៅទ្វីបអាហ្វ្រិក ចាំបាច់សម្រាប់អនាគតរបស់ពួកយើងទាំងអស់គ្នា ។

 ថ្លែងនៅក្នុងរដ្ឋធានី Luanda លោក Austin បានធ្វើការសង្កត់ធ្ងន់ពីការប្តេជ្ញាចិត្តរបស់សហរដ្ឋអាមេរិក ក្នុងការជួយពន្លឿនសន្តិសុខរបស់អាហ្វ្រិក និងធ្វើឲ្យល្អប្រសើរឡើងការការពាររបស់ពួកគេប្រឆាំងនឹងគ្រោះថ្នាក់សតវត្សរ៍ទី ២១ ។

 លោក Austin ដែលបំពេញទស្សនកិច្ចលើកដំបូងនៅអាហ្វ្រិក ចាប់តាំងពីឡើងកាន់តំណែងជារដ្ឋមន្រ្តីការពារជាតិសហរដ្ឋអាមេរិក បានអំពាវនាវឲ្យមានភាពជាដៃគូស្មើភាពគ្នារវាងសហរដ្ឋអាមេរិក និងអាហ្វ្រិក ដើម្បីបង្កើនសេរីភាព និងយុត្តិធម៌របស់ពួកយើងទាំងអស់គ្នា ។

 លោកថា លោកសូមនិយាយដោយស្មោះពីការងារលំបាកដែលពួកយើងប្រឈមលើបញ្ហាសន្តិសុខ ការប្រយុទ្ធប្រឆាំងអំពើភេរវកម្ម និងគ្រោះថ្នាក់សតវត្សរ៍ទី ២១ ។ លោកមានសុទិដ្ឋិនិយមខ្លាំងថា អនាគតចែករំលែងរបស់ពួកយើង គឺជាសន្តិភាព វិបុលភាព និងសេរីភាព ហើយបច្ចុប្បន្នកិច្ចសហប្រតិបត្តិការយោធារបស់ពួកយើងជាមួយដៃគូអាហ្វ្រិករបស់ពួកយើង គឺខ្លាំងក្លាជាងកាលពីរយៈពេលប៉ុន្មានឆ្នាំមុន ។

 លោក Austin និយាយទៀតថា ពួកយើងធ្វើការដើម្បីពង្រឹងទំនាក់ទំនងការពារជាតិរបស់ពួកយើងដែលប្រកបដោយភាពស្មើភាពគ្នា និងគោរពគ្នាទៅវិញទៅមក ។

 លោកនិយាយថា ដូច្នេះហើយនៅរយៈពេលប៉ុន្មានឆ្នាំខាងមុខ ពួកយើងត្រូវតែរួបរួមគ្នា ក្នុងនាមជាដៃគូស្មើភាពគ្នា ត្រូវធ្វើការជាមួយគ្នាលើការងារប្រឈមសន្តិសុខដ៏អស្ចារ្យ ត្រូវរួមគ្នាឆ្ពោះទៅរកសេរីភាព និងយុត្តិធម៌សម្រាប់ពួកយើងទាំងអស់គ្នា ៕