កាលពីពុធម្សិលមិញ ប្រធានាធិបតីរុស្ស៊ីលោក Vladimir Putin បានបញ្ជារដ្ឋាភិបាលរបស់លោកធ្វើឲ្យស្ថិរភាពតម្លៃលក់រាយប្រេងឥន្ធនៈ និងស្វែងរកវិធានការបន្ថែមទៀត ដើម្បីធ្វើឲ្យមានតុល្យភាពទីផ្សារក្នុងស្រុក បន្ទាប់ពីលោកបានណែនាំបំរាមលើការនាំចេញប្រេងសាំង និងប្រេងម៉ាស៊ូត ។

 លោក Putinបាននិយាយប្រាប់គណៈរដ្ឋមន្រ្តីរបស់លោកផងដែរថា ពួកយើងត្រូវការចាត់វិធានការភ្លាមៗ ហើយការពិនិត្យឡើងវិញពន្ធឧស្សាហកម្មប្រេង គឺជាជម្រើសមួយ ។

 កាលពីសប្តាហ៍មុន រដ្ឋាភិបាលរុស្ស៊ី បានណែនាំឲ្យមានបំរាមបណ្តោះអាស្ននលើការនាំចេញប្រេងសាំង និងប្រេងម៉ាស៊ូតដល់ប្រទេសទាំងអស់ ដែលនៅក្រៅរង្វង់រដ្ឋអតីតសហភាពសូវៀត ដើម្បីកាត់បន្ថយកំណើនតម្លៃប្រេងក្នុងស្រុក ។

 ស្របពេលដែលតម្លៃប្រេងដំបូងបានធ្វើឲ្យធូស្រាលការផ្លាស់ប្តូរទំនិញក្នុងស្រុកនោះ វាបានចាប់ផ្តើមហក់ឡើងខ្ពស់វិញ ក្រោយពេលបញ្ចប់វិធានការរឹតត្បិតកាលពីចុងសប្តាហ៍កន្លងទៅ ។

 ឧបនាយករដ្ឋមន្រ្តីរុស្ស៊ីលោក Alexander Novak និយាយប្រាប់លោក Putinថា រដ្ឋាភិបាលរុស្ស៊ី ត្រូវតែពិចារណាលើវិធានការបន្ថែមទៀត ។

 លោក Novak និយាយថា មាននូវសំណើរជាច្រើនដើម្បីរឹតត្បិតការនាំចេញប្រេង ហើយនិងបង្កើនតម្លៃពន្ធនាំចេញដល់ជាង ៥១៨ដុល្លាក្នុងចំណុះប្រេង ១តោន សម្រាប់អ្នកចង់លក់បន្ត ។

 សូមបញ្ជាក់ថា រុស្ស៊ី បានប្រឈមនឹងកង្វះខាតប្រេងសាំង និងប្រេងម៉ាស៊ូតក្នុងរយៈពេលប៉ុន្មានខែចុងក្រោយនេះ ហើយតម្លៃប្រេងលក់ដុំ បានហក់ឡើងខ្ពស់ បើទោះបីជាតម្លៃលក់រាយនៅទ្រឹងក៏ដោយ ។

 តម្រូវការប្រេងបានហក់ឡើងខ្ពស់នៅតំបន់ភាគខាងត្បូងរុស្ស៊ី ដែលជាតំបន់មជ្ឈមណ្ឌលកសិកម្ម ពេលដែលក្រុមប្រជាកសិករត្រូវការប្រមូលផលដំណាំរបស់ពួកគេ ៕