អាមេរិក ៖ ក្រសួងការពារជាតិអាមេរិក និយាយថា អាកាសយានិកអ៊ុយក្រែនបានចាប់ផ្តើមហ្វឹកហាត់ នៅសហរដ្ឋអាមេរិក ដើម្បីបញ្ជាយន្តហោះចម្បាំង F-16។ ប៉ុន្តែកម្មវិធីបណ្តុះបណ្តាលនេះអាចនឹងត្រូវជួបការរអាក់រអួល ប្រសិនបើរដ្ឋាភិបាលអាមេរិកត្រូវបានបិទ នៅចុងសប្តាហ៍នេះ។

ថ្លែងទៅកាន់អ្នកសារព័ត៌មាន កាលពីថ្ងៃព្រហស្បតិ៍ (ទី២៨ ខែកញ្ញា) អនុរដ្ឋមន្ត្រីព័ត៌មានរបស់មន្ទីរបញ្ជកោណ លោកស្រី Sabrina Singh បានបញ្ជាក់ថា ការបណ្តុះបណ្តាលភាសាអង់គ្លេស បានចាប់ផ្តើមហើយសម្រាប់អ្នកបើកបរយន្តហោះជាច្រើននាក់មកពីប្រទេសអ៊ុយក្រែន។ ការហ្វឹកហ្វឺនបែបនេះ តម្រូវឲ្យអាកាសយានិកទាំងនោះសិក្សាពាក្យបច្ចេកទេសដែលត្រូវការប្រើប្រាស់ ដើម្បីបញ្ជាយន្តហោះចម្បាំង។

ការហាត់សមហោះហើរ F-16 កំពុងដំណើរការរួចហើយ នៅប្រទេសដាណឺម៉ាក និងក្នុងប្រទេសមួយចំនួនទៀត នៅអឺរ៉ុប។ រដ្ឋបាលរបស់លោកប្រធានាធិបតី Joe Biden គ្រោងនឹងចាប់ផ្តើមការហ្វឹកហ្វឺន សម្រាប់អ្នកបើកយន្តហោះអ៊ុយក្រែន នៅឯមូលដ្ឋានទ័ពអាកាសមួយ នៅភាគខាងលិចរដ្ឋ Arizona ក្នុងខែតុលា។

សូមបញ្ជាក់ថា ទីក្រុងវ៉ាស៊ីនតោនមានបំណងដាក់ពង្រាយយន្តហោះចម្បាំងនៅអ៊ុយក្រែនឲ្យបានឆាប់តាមដែលអាចធ្វើទៅបាន ដែលជាផ្នែកនៃកិច្ចខិតខំប្រឹងប្រែងរបស់ខ្លួន ដើម្បីជួយគាំទ្រដល់ការវាយបករបស់អ៊ុយក្រែនប្រឆាំងនឹងកងកម្លាំងរុស្ស៊ី។

តែយ៉ាងណាក្ដី បញ្ហានៅត្រង់ថា ការពិភាក្សាថវិកាសម្រាប់ឆ្នាំសារពើពន្ធថ្មី ក្នុងសភាសហរដ្ឋអាមេរិក នៅតែជាប់គាំង។ ប្រសិនបើវិធានការផ្តល់ហិរញ្ញប្បទានសមស្រប មិនអាចរកឃើញច្រកចេញជាមួយសភា ត្រឹមយប់ថ្ងៃសៅរ៍ទេនោះ ស្ថាប័នរដ្ឋាភិបាលមួយចំនួននឹងត្រូវបិទដំណើរការ។ ដូច្នេះ ការព្រួយបារម្ភកំពុងកើនឡើង ដែលថា ការបណ្តុះបណ្តាលនេះ អាចត្រូវបានរំខាន ប្រសិនបើមានការពន្យារពេលក្នុងការបើកប្រាក់បៀវត្សរ៍បុគ្គលិក៕