ឥណ្ឌា ៖ នាយករដ្ឋមន្ត្រីកាណាដា លោក Justin Trudeau បាននិយាយថា ប្រទេសរបស់លោកមានភាពច្បាស់លាស់ ក្នុងការកសាងទំនាក់ទំនងកាន់តែជិតស្និទ្ធជាមួយប្រទេសឥណ្ឌា បើទោះបីជាមានជម្លោះការទូតជាបន្តបន្ទាប់ក៏ដោយ។ ការលើកឡើងចុងក្រោយបង្អស់របស់លោកនាយករដ្ឋមន្ត្រីរូបនេះ បានកើតមានឡើង ក្នុងពេលដែលទំនាក់ទំនងរវាងប្រទេសទាំង២ កាន់តែដុនដាបទៅៗមិនធ្លាប់មាន។

សូមរំលឹកថា ដំណើរដើមទងនៃភាពតានតឹងនេះបានចាប់ផ្ដើមផ្ទុះឡើង ដោយសារតែលោក Trudeau កាលពីថ្ងៃទី១៩ ខែកញ្ញា បាននិយាយថា ប្រទេសកាណាដាកំពុងស៊ើបអង្កេតការចោទប្រកាន់ ដែលអាចជឿទុកចិត្តបាននៃការជាប់ពាក់ព័ន្ធរបស់ឥណ្ឌា ក្នុងការធ្វើឃាតលើមេដឹកនាំផ្តាច់ខ្លួនសាសនា Sikh។ តែទីក្រុងញូវដេលីបានច្រានចោលការអះអាងនេះថា ជាការពោល «មិនសមហេតុផល»។ លោក Hardeep Singh Nijjar ត្រូវបានគេសម្លាប់នៅខាងក្រៅវិហារមួយ ក្នុងប្រទេសកាណាដា កាលពីខែមិថុនា។

តែយ៉ាងណាក្ដី កាលពីថ្ងៃព្រហស្បតិ៍ (ទី២៨ ខែកញ្ញា) នាយករដ្ឋមន្ត្រីកាណាដា បានបញ្ជាក់ថា ពិតជាមានសារៈសំខាន់ខ្លាំងណាស់ ក្នុងការភ្ជាប់ទំនាក់ទំនងជាមួយប្រទេសឥណ្ឌាប្រកបដោយការស្ថាបនា និងខ្លាំងក្លា។

សារព័ត៌មាន National Post របស់កាណាដា បានរាយការណ៍ ដោយដកស្រង់សម្តីលោក ដែលនិយាយថា៖ «ឥណ្ឌាគឺជាមហាអំណាចសេដ្ឋកិច្ច ដែលកំពុងរីកចម្រើន និងជាអ្នកដើរតួនាទីភូមិសាស្ត្រនយោបាយដ៏សំខាន់។ ហើយដូចដែលយើងបានបង្ហាញយុទ្ធសាស្រ្តឥណ្ឌូ-ប៉ាស៊ីហ្វិករបស់យើង កាលពីឆ្នាំមុន យើងពិតជាយកចិត្តទុកដាក់ខ្លាំងណាស់ ក្នុងការសាងទំនាក់ទំនងកាន់តែជិតស្និទ្ធជាមួយនឹងប្រទេសឥណ្ឌា»៕