ម៉ិចស៊ិច ៖ មហាសេដ្ឋី លោក Elon Musk បានឈានជើងចូលទៅក្នុងកិច្ចពិភាក្សាស្តីពីអន្តោប្រវេសន៍របស់សហរដ្ឋអាមេរិក កាលពីថ្ងៃព្រហស្បតិ៍ (ថ្ងៃទី 28 ខែកញ្ញា) ដោយការធ្វើដំណើរដោយផ្ទាល់ទៅកាន់ព្រំដែនរដ្ឋតិចសាស់ជាមួយប្រទេសម៉ិកស៊ិក ដើម្បីជួបជាមួយអ្នកនយោបាយមូលដ្ឋាន និងអ្នកអនុវត្តច្បាប់ និងដើម្បីទទួលបាននូវអ្វី ដែលរូបលោកហៅថា ជាទស្សនវិស័យ «ជំហានបឋម» លើស្ថានភាព។

ដំណើរទស្សនកិច្ចរបស់លោក Musk នេះ បានកើតឡើងក្នុងខណៈពេលដែលជនអន្តោប្រវេសន៍រាប់ពាន់នាក់ បានប្រថុយប្រថានធ្វើដំណើរទៅកាន់ភាគខាងជើងនៃប្រទេសម៉ិកស៊ិក ក្នុងរយៈពេលប៉ុន្មានថ្ងៃថ្មីៗនេះ តាមរថភ្លើង និងឡានក្រុង ហើយបន្ទាប់មកបានឆ្លងព្រំដែនសហរដ្ឋអាមេរិកចូលទៅរដ្ឋតិចសាស់ អារីហ្សូណា និងកាលីហ្វ័រញ៉ា ដោយបានធ្វើមានការកើនឡើងនៃការមកដល់របស់អ្នកស្វែងរកសិទ្ធិជ្រកកោននៅសហរដ្ឋអាមេរិក។

លោក Musk បានទៅមើលតំបន់ទីក្រុង Eagle Pass ជាកន្លែង ដែលជនអន្តោប្រវេសន៍ទាំងក្រុមៗ បានដើរឆ្លងកាត់ទឹកទន្លេ Rio Grande ក្បែរស្ពានផ្លូវរថភ្លើង ក្នុងតំបន់ Eagle Pass ដោយមិនមានការរារាំងពីការដាក់របងលួសបន្លា នៅតាមច្រាំងទន្លេ ដោយឆ្មាំល្បាតព្រំដែនជាតិរដ្ឋតិចសាស់នោះឡើយ៕

លោក Musk បានជំរុញឲ្យមានវិធីសាស្រ្ត ២ផ្លូវ ក្នុងការកែប្រែច្បាប់អន្តោប្រវេសន៍របស់សហរដ្ឋអាមេរិក តាមរយៈវីដេអូសែលហ្វី (Selfie) ដែលបានបង្ហោះនៅលើបណ្ដាញសង្គម X (ពីមុនជា Twitter)៕