មេដឹកនាំបក្សប្រឆាំងទុយនីស៊ី ដែលកំពុងជាប់ពន្ធនាគារ គឺលោក Rached Ghannouchi ដែលជាអ្នករិះគន់យ៉ាងខ្លាំងក្លាលើប្រធានាធិបតី លោក Kais Saied បានចាប់ផ្តើមថ្វើកូដកម្មអត់អាហាររយៈពេល ៣ថ្ងៃ ដើម្បីគាំទ្រដល់ឥស្សរជនប្រឆាំងផ្សេងទៀត ដែលកំពុងជាប់ពន្ធនាគារដូចគ្នាដែរ។ នេះបើតាមគណបក្សឥស្លាមនិយម Ennahda នាថ្ងៃសុក្រ (ទី២៩ ខែកញ្ញា) នេះ។

សូមរំលឹកថា លោក Ghannouchi វ័យ ៨២ឆ្នាំ ត្រូវបានកាត់ទោសឲ្យជាប់ពន្ធនាគាររយៈពេល ១ឆ្នាំ កលាពីខែឧសភា ក្រោមការចោទប្រកាន់ពីបទញុះញង់ និងរៀបចំផែនការប្រឆាំងនឹងសន្តិសុខរដ្ឋ ហើយឥស្សរជនគណបក្សប្រឆាំងជាង ២០នាក់ផ្សេងទៀត ក៏ត្រូវបានចាប់ឃុំខ្លួនដែរ ក្នុងឆ្នាំនេះ។

សេចក្តីថ្លែងការណ៍របស់គណបក្ស Ennahda បានឲ្យដឹងថា មេដឹកនាំរបស់ខ្លួន បានចាប់ផ្តើមសកម្មភាពរយៈពេល ៣ថ្ងៃ ដើម្បីគាំទ្រដល់ឥស្សរជនគណបក្សប្រឆាំង នៅក្នុងពន្ធនាគារ ដែលកំពុងតវ៉ា ចំពោះអ្វី ដែលពួកគេនិយាយថាជាការជាប់ពន្ធនាគារដោយអយុត្តិធម៌។

លោក Ghannouchi ដែលជាអ្នកទោសនយោបាយ និងនិរទេសខ្លួន នៅមុនបដិវត្តន៍ឆ្នាំ២០១១ ដែលនាំមកនូវលទ្ធិប្រជាធិបតេយ្យ គឺជាប្រធានសភាពីការបោះឆ្នោតឆ្នាំ២០១៩ ហើយគណបក្សរបស់លោក គឺជាគណបក្សធំជាងគេបំផុត នៅក្នុងសភា រហូតដល់លោក Saied បានបញ្ជូនរថក្រោះទៅបិទគណបក្សនេះ នៅឆ្នាំ២០២១៕