​

មន្ត្រីទីភ្នាក់ងារជនភៀសខ្លួនអង្គការសហប្រជាជាតិ កាលពីថ្ងៃសុក្រ បាននិយាយថា មនុស្សជាង ៨៨.០០០ នាក់ បានឆ្លងចូលមកក្នុងប្រទេសអាមេនី ពីតំបន់ណាហ្គ័រណូ-ការ៉ាបាក់(Nagorno-Karabakh) ហើយចំនួនសរុបអាចឡើងដល់ ១២០.០០០នាក់ ជាតួលេខដែលត្រូវគ្នាទៅនឹងការប៉ាន់ស្មាននៃចំនួនប្រជាជនទាំងអស់នៅតំបន់ផ្តាច់ខ្លួន ដែលដណ្តើមយកមកវិញដោយប្រទេសអាស៊ែរបៃហ្សង់ កាលពីសប្តាហ៍មុន។ លោកស្រី កាវីតា បេឡានី(Kavita Belani) អ្នកតំណាងអង្គការ UNHCR ប្រចាំប្រទេសអាមេនី បាននិយាយក្នុងសន្និសីទសារព័ត៌មានរបស់អង្គការសហប្រជាជាតិ តាមបណ្តាញវីដេអូថា ក្រុមមនុស្សហត់នឿយ និងភ័យខ្លាច ជាច្រើនកំពុងមកប្រមូលផ្តុំគ្នានៅមជ្ឈមណ្ឌលចុះឈ្មោះ។លោកស្រី រីជីណា ដឺ ម៉ូនីស៊ីស(Regina De Dominicis) នាយកប្រចាំតំបន់របស់អង្គការយូនីសេហ្វ( UNICEF) បាននិយាយថា ជិតមួយភាគបីនៃជនភៀសខ្លួន គឺជាកុមារ។ លោក Carlos Morazzani នាយកគ្រប់គ្រងប្រតិបត្តិការនៃគណៈកម្មាធិការអន្តរជាតិកាកបាទក្រហម បាននិយាយថា គណៈកម្មាធិការ បានផ្ទេរសាកសពប្រមាណ២០០ ចេញពីទីក្រុងការ៉ាបាក់ កាលពីថ្ងៃព្រហស្បតិ៍ ទី ២៨ ខែកញ្ញា ដែលជាជនរងគ្រោះនៃការផ្ទុះឃ្លាំងប្រេងឥន្ធនៈ និងការប្រយុទ្ធគ្នាកាលពីពេលថ្មីៗនេះ។ ចាប់តាំងពីប្រទេសអាស៊ែរបៃហ្សង់ បានបើកការវាយប្រហារលើតំបន់ណាហ្គ័រណូ-ការ៉ាបាក់ កាលពីថ្ងៃទី ១៩ ខែកញ្ញា ទីភ្នាក់ងារជនភៀសខ្លួនរបស់អង្គការសហប្រជាជាតិបាននិយាយថា ជនភៀសខ្លួនជាង ៨៨.៧០០នាក់ បានមកដល់ប្រទេសអាមេនី ដែលភាគច្រើននៅក្នុងតំបន់ Syunik ភាគខាងត្បូងរបស់ប្រទេស។ លោកស្រី Kavita Belani អ្នកតំណាងអង្គការ UNHCR ប្រចាំប្រទេសអាមេនី និយាយថា ចំនួនកំពុងកើនឡើង ហើយតម្រូវការក៏កំពុងកើនឡើងផងដែរ។ រដ្ឋាភិបាលបានចុះបញ្ជីជនភៀសខ្លួនជាង ៦៣.០០០នាក់ ក្នុងចំណោមជនភៀសខ្លួន ៨៨.៧០០នាក់។ លោកស្រី បាននិយាយថា រដ្ឋាភិបាល អង្គការសហប្រជាជាតិ និងទីភ្នាក់ងារអន្តរជាតិ និងអង្គការមិនមែនរដ្ឋាភិបាល កំពុងបង្កើតតង់ ផ្តល់ពូក ភួយ អាហារក្តៅ និងរបស់របរចាំបាច់ផ្សេងទៀតដល់សហគមន៍ដែលកំពុងកើនឡើង។