អូឡាំពិក៖ ជប៉ុនដែលជាម្ចាស់ផ្ទះរៀបចំព្រឹត្តិការណ៍អូឡាំពិករដូវក្តៅ ២០២០ ខាងមុខនេះបានចាប់ផ្តើមចាក់សវ៉ាក់សាំងប្រឆាំង Covid-19 ដល់អត្តពលិករបស់ខ្លួនហើយ ខណៈសល់ពេលមិនដល់ ២ខែទៀតទេព្រឹត្តិការណ៍នឹងចាប់ផ្តើម។
អគ្គលេខាធិការគណៈកម្មាធិការអូឡាំពិកជប៉ុន លោក Tsuyoshi Fukui បានកោតសរសើរចំពោះការចាប់ផ្តើមចាក់វ៉ាក់សាំង សម្រាប់អត្តពលិកជប៉ុនកាលពីថ្ងៃអង្គារដោយនិយាយថា ពេលនេះអត្តពលិកបានធូរស្បើយ ក្នុងការចូលរួមក្នុងព្រឹត្តិការណ៍កីឡាអូឡាំពិកដោយសុវត្ថិភាព។ អត្តពលិកគ្រូបង្វឹក គ្រូបង្វឹក និងក្រុមការងារពាក់ព័ន្ធរបស់ជប៉ុនប្រមាណ ២០០ នាក់បានទទួលវ៉ាក់សាំងដែលរៀបចំឡើងកាលពីថ្ងៃចន្ទ នៅឯមជ្ឈមណ្ឌលហ្វឹកហ្វឺនកីឡាជាតិ Ajinomoto។ ប្រទេសជប៉ុនមានការយឺតយ៉ាវ ក្នុងការស្វះស្វែងរកវ៉ាក់សាំងប្រឆាំង Covid-19 ជូនប្រជាពលរដ្ឋរបស់ខ្លួន ស្របពេលដែលព្រឹត្តិការណ៍អូឡាំពិកនៅសល់ពេលមិនដល់ ២ខែទៀតផងនឹងចាប់ផ្ដើម។
ជប៉ុនមកដល់ពេលនេះទើបចាក់វ៉ាក់សាំង ជូនប្រជាពលរដ្ឋរបស់ខ្លួនបានត្រឹម ២% ប៉ុណ្ណោះនៃចំនួនប្រជាជនសរុបដែលអាចចាក់វ៉ាក់សាំងបាន។ ព្រឹត្តិការណ៍អូឡាំពិករដូវក្តៅទីក្រុងតូក្យូ ២០២០ ដែលលើកមកដល់ ២០២១ នេះដោយសារ Covid-19 នោះនឹងចាប់ផ្ដើមនៅថ្ងៃទី២៣ ខែកក្កដាខាងមុខនេះហើយនឹងបញ្ចប់នៅថ្ងៃទី៨ ខែសីហា៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
