អ្នកស្រុកនៅភាគខាងកើតនៃទីក្រុង Derna របស់ប្រទេសលីប៊ី កំពុងព្យាយាមសម្អាតហាង និងផ្ទះសម្បែងរបស់ពួកគេ បន្ទាប់ពីរងគ្រោះដោយទឹកជំនន់ដ៏មហន្តរាយ ដែលបានសម្លាប់មនុស្សរាប់ពាន់នាក់ និងបានបំផ្លិចបំផ្លាញតំបន់ទាំងមូល។

ម្ចាស់ផ្សារទំនើបមួយ បានស្វាគមន៍បុរសម្នាក់ឲ្យចូលមកក្នុងអាជីវកម្ម ដែលរងខូចខាតរបស់គាត់ ឱបគាត់ ហើយដើរចេញមកជាមួយគាត់ ដោយនិយាយហ៊ឹមៗថា៖ «អរគុណព្រះជាម្ចាស់ ដែលខ្ញុំនៅមានជីវិត» ហើយបងប្រុសរបស់គាត់ឈ្មោះ Mohamed al-Ghoeil វ័យ ៤៩ឆ្នាំ បានរៀបរាប់ពីការឈឺចាប់និងភាពសោកសៅរបស់អ្នកស្រុកទីនេះ។

លោក Ghoeil បាននិយាយថា៖ «យើងបានសម្រេចចិត្តកាត់បន្ថយការឈឺចាប់ខ្លះរបស់ពួកយើង ដោយសម្អាតអ្វីដែលយើងអាចសម្អាតបាន ដើម្បីនាំជីវិតឲ្យត្រឡប់មកធម្មតាវិញ ក្នុងតំបន់រងទុក្ខនេះ»។ លោកបាននិយាយបន្ថែមថា «មនុស្សល្អមួយចំនួន» បានផ្តល់ឧបករណ៍សម្អាត ចំពេល «អវត្តមានទាំងស្រុង» ពីរដ្ឋ។

សូមបញ្ជាក់ថា មនុស្សរាប់ពាន់នាក់ត្រូវបានបញ្ជាក់ថា បានស្លាប់ បន្ទាប់ពីការបាក់ទំនប់ទឹក ដែលបណ្ដាលឲ្យមានទឹកជំនន់ជន់លិចទីក្រុង Derna កាលពីដើមខែនេះ ហើយរាប់ពាន់នាក់ទៀត នៅតែបាត់ខ្លួន ដោយអគារទាំងមូលជាច្រើនខ្នង ត្រូវបានទឹកហូរនាំចូលទៅក្នុងសមុទ្រ៕