ក្រុមហ៊ុនទើបបង្កើតថ្មី Tsubame Industries ដែលមានមូលដ្ឋាននៅទីក្រុងតូក្យូ បានចំណាយពេល ២ឆ្នាំក្នុងការអភិវឌ្ឍន៍មនុស្សយន្តកង់បួនកម្ពស់ ៤,៥ម៉ែត្រ ដែលមានរូបរាងស្រដៀងទៅនឹង «Mobile Suit Gundam» ដែលជាមនុស្សយន្តយកចេញពីរឿងភាគគំនូរជីវចលជប៉ុនដ៏ពេញនិយម ដោយមនុស្សយន្តនេះ នឹងត្រូវដាក់បង្ហាញក្នុងកម្មវិធី Japan Mobility Show នៅចុងខែតុលានេះ។

បន្ទាប់មកក្រុមហ៊ុន Tsubame Industries គ្រោងនឹងដាក់លក់មនុស្សយន្តនេះចំនួន ៥គ្រឿង ដោយមានតម្លៃ ៤០០លានយ៉េន (២,៧លានដុល្លារ) ក្នុងមួយគ្រឿង។

ដោយត្រូវបានគេហៅថា ARCHAX តាមរូបរាងរបស់ពពួកសត្វដាយណូស័រមានស្លាប មនុស្សយន្តនេះមានម៉ូនីទ័រកាប៊ីនយន្ដហោះ ដែលទទួលរូបភាពពីកាមេរ៉ាដែលភ្ជាប់ទៅផ្នែកខាងក្រៅ ដើម្បីឲ្យអ្នកបញ្ជាអាចបត់បែនប្រអប់ដៃ និងដៃដោយប្រើឧបករណ៍បញ្ជាយន្តហោះ ឬចយស្ទីកពីផ្នែកខាងក្នុងដងខ្លួនរបស់មនុស្សយន្តនេះ។

នាយកប្រតិបត្តិរបស់ក្រុមហ៊ុន Tsubame លោក Ryo Yoshida បាននិយាយថា លោកចង់បង្កើតអ្វីមួយដែលជាការរួមបញ្ចូលគ្នាពីភាពខ្លាំងរបស់ប្រទេសជប៉ុន នៅក្នុងគំនូរជីវចល មនុស្សយន្ត និងយានយន្ត៕