កាលពីថ្ងៃអាទិត្យម្សិលមិញ ប្រទេសហូឡង់ បានបញ្ឈប់ការផលិតរបស់ខ្លួននៅវាលអណ្តូងឧស្ម័នធំបំផុតរបស់អឺរ៉ុប ស្ថិតនៅខេត្ត Groningen (ក្រូនីងហ្គេន) រយៈពេល ១ទសវត្សរ៍ ក្រោយភាពរំញ័របណ្តាលមកពីការខួង ធ្វើឲ្យខូចខាតអគារ ។ 

 ការផលិតឧស្ម័ននៅខេត្តភាគខាងជើងប្រទេសហូឡង់មួយនេះ បានចាប់ផ្តើមឡើងនៅទសវត្សរ៍ឆ្នាំ ១៩៦០ ប៉ុន្តែវាត្រូវបានបញ្ចប់បន្តិចម្តងៗ ក្នុងរយៈពេល ១ទសវត្សរ៍កន្លងមកនេះ ដោយសារតែគ្រោះថ្នាក់ វាបង្កឲ្យមានការរញ្ជួយដី ។ 

 ការផលិតនៅក្នុងឆ្នាំ ២០២២-២០២៣ដែលបានបញ្ចប់កាលពីថ្ងៃទី ១ ខែតុលា ទទួលបានឧស្ម័នចំនួនតិចជាង ៣ពាន់លានម៉ែត្រគូប ។ 

 ក្រសួងកិច្ចការសេដ្ឋកិច្ចហូឡង់ និយាយនៅក្នុងសេចក្តីថ្លែងការណ៍ថា សម្រាប់រដូវរងារខាងមុខនេះ គេនៅមានលទ្ធភាពនៃការបើកវាលអណ្តូងឧស្ម័នឡើងវិញ ដើម្បីផលិតឧស្ម័នក្នុងបរិមាណតិច បើសិនមានរយៈពេលត្រជាក់ខ្លាំង ឬរយៈពេលច្រើនថ្ងៃ ពេលដែលសីតុណ្ហភាពធ្លាក់ធ្លាក់ចុះ ៦អង្សាសេក្រោមសូន្យ ។ 

 ប្រជាពលរដ្ឋរស់នៅជិតទីតាំងផលិតឧស្ម័ន បានត្អូញត្អែអស់រយៈពេលជាង ២០ឆ្នាំមកហើយថា មានភាពរញ្ជួយបង្កឡើងដោយសារប្រតិបត្តិការខួង ។ 

 ប្រជាពលរដ្ឋ បានស្វាគមន៍ព័ត៌មានកាលពីឆ្នាំ ២០១៨ថា វាលអណ្តូងឧស្ម័នមួយនេះ នឹងត្រូវបិទ ប៉ុន្តែក្រុមអ្នកជំនាញ បានព្រមានថា ការរញ្ជួយដី អាចនឹងបន្តកើតឡើងច្រើនឆ្នាំទៀត ៕