វេជ្ជបណ្ឌិតព្យាបាលរោគស្រ្តីដែលជាម្ចាស់ជ័យលាភីពានរង្វាន់ណូបែលសន្តិភាពរបស់សាធារណរដ្ឋប្រជាធិបតេយ្យកុងហ្គោលោក Denis Mukwege ដែលល្បីឈ្មោះសម្រាប់ការជួយជនរងគ្រោះដោយសារការចាប់រំលោភសេពសន្ថវៈនោះ បាននិយាយកាលពីថ្ងៃចន្ទថា លោកនឹងឡើងដណ្តើមតំណែងប្រធានាធិបតីនៅការបោះឆ្នោតនាខែធ្នូខាងមុខនេះ ។ 

 លោក Mukwege ដែលបានឈ្នះពានរង្វាន់មួយនេះ កាលពីឆ្នាំ ២០១៨ សម្រាប់ការប្រយុទ្ធប្រឆាំងអស់រយៈពេល ២ទសវត្សរ៍របស់លោកប្រឆាំងនឹងអំពើហិង្សាផ្លូវភេទ បានប្រកាសបែបនេះ ទៅកាន់ក្រុមអ្នកគាំទ្ររបស់លោក នៅមជ្ឈមណ្ឌលសន្និសីទ ស្ថិតនៅក្នុងរដ្ឋធានី Kinshasa របស់ប្រទេសកុងហ្គោ ។ 

 នៅក្នុងសុន្ទរកថាដែលរិះគន់ធ្ងន់ៗលើរបបដឹកនំាបច្ចុប្បន្ន លោកនិយាយថា ហេតុផលតែមួយគត់របស់លោក គឺដើម្បីស្រោចស្រង់ និងអភិវឌ្ឍប្រទេសរបស់ពួកយើង ។ លោកបន្តថា លោកនឹងផ្តល់រៀងរ៉ាវលម្អិតនៃកម្មវិធីអភិវឌ្ឍប្រទេសរបស់លោកនៅពេលក្រោយ ។ 

 លោក Mukwege វ័យ ៦៨ឆ្នាំ បានព្យាបាលជនរងគ្រោះដោយសារការចាប់រំលោភសេពសន្ថវៈរាប់រយនាក់នៅមន្ទីរពេទ្យ Panzi ដែលលោកបានបង្កើតឡើងកាលពីឆ្នាំ ១៩៩៩ ។ 

 មន្ទីរពេទ្យមួយនេះ ស្ថិតនៅតំបន់ភាគខាងកើតប្រទេសកុងហ្គោ ជាកន្លែលក្រុមជីវពលដែលបានឆ្លងកាត់សង្រ្គាមស៊ីវិល ២លើក ចន្លោះឆ្នាំ ១៩៩៦ និងឆ្នាំ ២០០៣ នៅតែបន្តធ្វើសង្រ្គាម និងវាយប្រហារមកលើជនស៊ីវិល បើទោះបីជាមានការធ្វើអន្តរាគមន៍ពីយោធាក៏ដោយ ។ 

 លោក Mukwege នឹងឈរឈ្មោះប្រកួតប្រជែងជាមួយលោកប្រធានាធិបតី Felix Tshisekedi ដែលអាណត្តិដំបូងរបស់លោកញាំញីដោយសារការវិបត្តិសេដ្ឋកិច្ច ការរីករាលដាលឆ្លងសកលជំងឺ COVID-19 និងអសន្តិសុខកាន់តែខ្លាំង នៅតំបន់ភាគខាងកើតប្រទេសកុងហ្គោ ៕