ភ្នំពេញ៖ មន្រ្ដីយោធាចំនួន ៣នាក់ នៅសាលាទាហានសកម្មត្មាតពង និង​អគ្គបញ្ជាការដ្ឋាន​កង​យោធពល​ខេមរភូមិន្ទ ត្រូវបានលុបឈ្មោះចេញពីក្របខណ្ឌ ដោយសារ​តែពាក់ព័ន្ធ​នឹង​ការ​ប្រើប្រាស់​គ្រឿង​ញៀន។

យោងតាមសេចក្តីសម្រេចចុះហត្ថលេខាដោយនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ កាលពីថ្ងៃទី ២៩ ខែកញ្ញា ឆ្នាំ ២០២៣នេះ បានសម្រេចលុបឈ្មោះ វរសេនីយ៍ត្រី ពោន ធា គ្រូបច្ចេកទេសថ្មើរជើង សាលានាយទាហានសកម្ម។

ជាមួយគ្នានេះ យោងតាមសេចក្តីសម្រេចចុះហត្ថលេខាដោយនាយឧត្តមសេនីយ៍ វង្ស ពិសេន អគ្គ​មេបញ្ជា កងយោធពលខេមរភូមិន្ទ កាលពីថ្ងៃទី ២៥ ខែកញ្ញា ឆ្នាំ ២០២៣នេះដែរ បាន​សម្រេច​លុប​ឈ្មោះយោ​ធិន ចំនួន ២រូបទៀត រួមមាន អនុសេនីយ៍ត្រី សាន្ត គឹមសៀង នាយទាហាន សាលា​នាយទាហានសកម្ម និងព្រឹន្ទបាលឯក យ៉ែន ច័ន្ទវិសាល នាយរងក្រុម១ អនុ​សេនា​តូច​ការពារ​ និង​បម្រើ​សាលា​នាយទាហាន​សកម្ម​ចេញ​ពី​ក្រប​ខណ្ឌ នៃ​កង​យោធពល​ខេមរភូមិន្ទ​ផង​ដែរ​ពាក់​ព័ន្ធ​នឹង​ការប្រើប្រាស់គ្រឿងញៀន៕