កាលពីថ្ងៃអង្គារ រដ្ឋាភិបាលកូឡុំប៊ី បានសុំទោសជាលើកដំបូងសម្រាប់ការប្រហារជីវិតក្រៅប្រព័ន្ធតុលាការលើយុវជន ១៩នាក់ ក្រោមកណ្តប់ដៃកងទ័ព អំឡុងជម្លោះយោធា ។

ជាលើកដំបូងក្នុងប្រវត្តិសាស្រ្តកូឡុំប៊ី មន្រ្តីជាន់ខ្ពស់មួយរូប បាននិយាយសុំទោស និងទទួលស្គាល់ទំនួលខុសត្រូវរបស់រដ្ឋាភិបាលកូឡុំប៊ី នៅក្នុងរឿងអាស្រូវដែលបានរង្គោះរង្គើរកូឡុំប៊ីកាលពីចុងទសវត្សរ៍ឆ្នាំ ២០០០ ជាពេលដែលកងទ័ព ត្រូវបានគេរកឃើញថា បានសម្លាប់ជនស៊ីវិល និងចុះឈ្មោះពួកគេថាជាទ័ពព្រៃ ត្រូវសម្លាប់អំឡុងពេលសង្រ្គាម ។

រដ្ឋមន្រ្តីក្រសួងការពារជាតិកូឡុំប៊ីលោក Ivan Velasquez បាននិយាយសុំទោស ខណៈដែលលោកប្រធានាធិបតី Gustavo Petro និងសាច់ញាតិជនរងគ្រោះ បានចូលរួមពិធីរំឭកខួបនៅទីលានចតុរង្គ Bolivian ស្ថិតក្នុងទីក្រុង Bogota ។

យោងតាមសារព័ត៌មានក្នុងស្រុក បានឲ្យដឹងថា ការសុំទោសនេះ កើតចេញពីការកាត់ទោសឆ្នាំ ២០១៥ដោយតុលាការក្នុងស្រុក មកពីរដ្ឋ Santander ដែលបានបញ្ជាឲ្យរដ្ឋាភិបាលកូឡុំប៊ី ស្នើសុំការលើកលែងទោសសម្រាប់ករណីដែលបានសម្លាប់យុវជន Jaime Estiven Valencia ។

សូមបញ្ជាក់ថា សង្រ្គាមរយៈពេល ៥ទសវត្សរ៍របស់កូឡុំប៊ី ប្រឆំាងនឹងក្រុមឧទ្ទាម បានសម្លាប់មនុស្ស ២០ម៉ឺននាក់ មនុស្ស ៧,៧លាននាក់ ត្រូវបានជម្លៀសខ្លួន ហើយមនុស្ស ៦ម៉ឺននាក់ទៀត ត្រូវបានចុះបញ្ជី ថាបានបាត់ខ្លួន ៕