អុីស្រាអែល ៖ ក្រុមមន្ត្រីនិងអ្នកជំនាញ បាននិយាយថា អ៊ីស្រាអែលបានជួយដោយសម្ងាត់នូវយុទ្ធនាការរបស់ អាស៊ែរបៃហ្សងក្នុងការដណ្តើមយកតំបន់ណាហ្គូណ័រ-ការ៉ាបាក់ (Nagorno-Karabakh)មកឡើងវិញ ដោយផ្គត់ផ្គង់អាវុធដ៏មានឥទ្ធិពលដល់អាស៊ែរបៃហ្សង់ មុនពេលការវាយលុកផ្លេកបន្ទោររបស់ខ្លួនកាលពីខែមុន ដែលបាននាំឲ្យក្រុមជនជាតិភាគតិចអាមេនី ត្រឡប់មកនៅក្រោមការគ្រប់គ្រងរបស់ខ្លួនវិញ។

ទិន្នន័យតាមដានការហោះហើរបានឲ្យដឹងងថា រយៈពេលប៉ុន្មានសប្តាហ៍ មុនពេលអាស៊ែរបៃហ្សង់ ចាប់ផ្តើមការវាយលុក២៤ម៉ោងរបស់ខ្លួន នៅថ្ងៃទី១៩ ខែកញ្ញា យន្តហោះដឹកទំនិញយោធាអាស៊ែរបៃហ្សង់ បានហោះហើរម្តងហើយម្តងទៀតនៅចន្លោះមូលដ្ឋានទ័ពអាកាសអ៊ីស្រាអែលភាគខាងត្បូង និងអាកាសយានដ្ឋាននៅជិតតំបន់ណាហ្គូណ័រ-ការ៉ាបាក់ ខណៈដែលក្រុមរដ្ឋាភិបាលលោកខាងលិច កំពុងជំរុញឲ្យមានការចរចាសនិ្តភាព។

ជើងហោះហើរនេះ បានធ្វើឲ្យមន្ត្រីអាមេនីនៅទីក្រុងយ៉េរ៉េវ៉ាន់មានការប្រុងប្រយ័ត្នជាយូរមកហើយចំពោះសម្ព័ន្ធភាពយុទ្ធសាស្ត្ររវាងអ៊ីស្រាអែល និងអាស៊ែរបៃហ្សង់ ហើយបានបង្ហាញពីផលប្រយោជន៍ជាតិរបស់អ៊ីស្រាអែល នៅក្នុងតំបន់ដែលមានភាពជ្រួលច្របល់ភាគខាងត្បូងនៃតំបន់ភ្នំកូកាស(Caucasus)។

លោកអាមែន អាកូភៀន (Arman Akopian) ឯកអគ្គរដ្ឋទូតរបស់ប្រទេសអាមេនីប្រចាំនៅអ៊ីស្រាអែល បានប្រាប់សារព័ត៌មានAPថា៖«សម្រាប់ពួកយើង វាគឺជាការព្រួយបារម្ភដ៏ធំមួយដែលអាវុធរបស់អ៊ីស្រាអែលបានបាញ់មកលើប្រជាជនរបស់យើង»។ ក្នុងការផ្លាស់ប្តូរការទូតដ៏ច្របូកច្របល់ លោកអាកូភៀន បាននិយាយថា ខ្លួនបានសម្តែងការព្រួយបារម្ភចំពោះអ្នកនយោបាយ និងសមាជិកសភាអ៊ីស្រា     អែលក្នុងប៉ុន្មានសប្តាហ៍ថ្មីៗនេះ ជុំវិញការដឹកជញ្ជូនអាវុធរបស់អ៊ីស្រាអែល។