ក្រសួងការពារជាតិរុស្ស៊ី និយាយនៅថ្ងៃព្រហស្បតិ៍នេះថា ទាហានកងកម្លាំងពិសេសស៊ីរី បានលោតឆ័ត្រយោងជាង ១.៥០០លើក នៅលើសមុទ្រមេឌីទែរ៉ាណេ និងនៅខេត្តអាឡេប៉ូ ហើយនិងខេត្តឡាតាគី ដែលជាផ្នែកមួយនេះសមយុទ្ធយោធារួមគ្នា ធ្វើឡើងដោយប្រើប្រាស់យន្តហោះយោធារុស្ស៊ី ។

 រូបភាពវីដេអូឃ្លីប ចេញផ្សាយដោយក្រសួងការពារជាតិរុស្ស៊ី ឃើញក្រុមទាហានឆ័ត្រយោងស៊ីរី លោតចេញពីលើយន្តហោះយោធា និងឧទ្ធម្ភាគចក្ររុស្ស៊ី ដែលរួមទាំងអ្វីដែលពួកគេនិយាយថា វាគឺជាការលោតឆ័ត្រយោងទ្រង់ទ្រាយធំលើកដំបូងរបស់កងទ័ពអារ៉ាប់ស៊ីរី ចេញពីលើយន្តហោះយោធា IL-76 នៅពេលយប់ ។

 ក្រសួងការពារជាតិរុស្ស៊ី និយាយទៀតថា ទាហានរុស្ស៊ី នៅប្រទេសស៊ីរី បានធានាការអនុវត្តន៍សមយុទ្ធទូលំទូលាយរបស់អង្គភាពកងកម្លាំងពិសេសស៊ីរី ។

 សូមបញ្ជាក់ថា រុស្ស៊ីស្ថិតនៅក្នុងចំណោមប្រទេសសម្ព័ន្ធមិត្តដ៏សំខាន់របស់ប្រធានាធិបតីស៊ីរី លោក បាសា អាល់ អាសាដ ។ ការអន្តរាគមន៍របស់ទីក្រុងម៉ូស្គូជាមួយអ៊ីរ៉ង់ បានបង្វែរទំនោរទៅលើលោក អាសាដ នៅក្នុងសង្រ្គាមស៊ីវិលអូសបន្លាយពេលជាង ១ទសវត្សរ៍នៅក្នុងប្រទេសមួយនេះ ៕