​បាល់ទាត់៖ ​ក្លិប​អេ​ស្ប៉ា​ញ Barcelona បានប្រកាស​ពី​ការមកដល់​របស់​ខ្សែការពារ​កណ្តាល Eric Garcia ពី Manchester City ម្នាក់ទៀត បន្ទាប់ពី Sergio Aguero ដែល​ទើបត្រូវ​បានបង្ហាញ​កាលពី​ថ្ងៃអាទិត្យ​។

​កីឡាករ​វ័យ ២០ឆ្នាំ​រូបនេះ​មាន​ទំនាក់ទំនង​ផ្ទេរ​ ត្រលប់​មកកាន់​ក្លិប​ដើម​របស់ខ្លួន​ជិត​មួយឆ្នាំ​ហើយ តែ​ការផ្ទេរ​មិនបាន​សំរេច​កាលពីដើម​រដូវ​កាល​មុន ​ក៏ដូចជា​ពេល​ទីផ្សារ​ដោះដូរ​កីឡាករ​បើក​ម្តងទៀត​កាលពី​ខែមករា​។ ​​Barcelona កំពុង​ត្រូវការ​ជា​ចាំបាច់​ខ្សែការពារ​កណ្តាល ហើយ​ការមកដល់​របស់ Garcia នេះ​មិនមាន​តំលៃ​ផ្ទេរ​ឡើយ ​បន្ទាប់ពី​កិច្ចសន្យា​របស់គេ​អស់​សុពលភាព​នៅ Manchester City​។​ ​​រំលឹកថា Eric Garcia ធ្លាប់​ចំណាយពេល ៩ឆ្នាំ​លេង​អោយ​ក្រុមយុវជន Barcelona មុនពេល​ផ្ទេរ​មកកាន់ Manchester City នៅ​ឆ្នាំ២០១៧ តែ​ក្រោយមក​ក៏ត្រូវ​បាន​គេ​ចុះផ្សាយ​ថា Garcia ចង់​ត្រលប់​ទៅ​អេ​ស្ប៉ា​ញ​វិញ​។

​​Eric Garcia បង្ហាញខ្លួន​អោយ Manchester City បាន ៧ប្រកួត​រាប់​ពី​បាល់ទាត់​ចាប់ផ្តើម​ឡើងវិញ​កាលពី​ខែមិថុនា​ឆ្នាំមុន តែ​រដូវ​កាល​នេះ​លេង​បានតែ ២ប្រកួត​ប៉ុណ្ណោះ ខណៈ​តំណែង​របស់គេ​ស្ថិតនៅ​ពីក្រោម Ruben Dias និង​ Nathan Ake ក៏ដូចជា Aymeric Laporte​។​ ​​Eric Garcia បាន​ក្លាយជា​កីឡា​ករទី​ពីរ​ដែល​ផ្ទេរ​មកកាន់ Barcelona មុន​រដូវ​កាល​ថ្មី​ចាប់ផ្តើមបន្ទាប់​ពី Sergio Aguero ដែល​អ្នក​ទាំងពីរ​សុទ្ធ​អស់​សុពលភាព​កិច្ចសន្យា​នៅ Manchester City៕

​អត្ថបទ​៖​នាង សុភា​វុ​ធ