អាមេរិក ៖ កងទ័ពអាមេរិក បានបង្ហាញកាលពីថ្ងៃសុក្រថា កងកម្លាំងទ័ពជើងទឹកអាមេរិក បានបញ្ជូនយានដ្រូន ដើម្បីតាមដាននាវាចម្បាំង និងកប៉ាល់របស់អ៊ីរ៉ង់ នៅជុំវិញដែនទឹកមជ្ឈិមបូព៌ាសំខាន់ៗអស់រយៈពេលជាច្រើនថ្ងៃកាលពីខែមុន ខណៈដែលក្រុងវ៉ាស៊ីនតោន កំពុងស្វែងរកមធ្យោបាយ ដើម្បីរារាំងទីក្រុងតេអេរ៉ង់ពីការយាយីជាបន្តបន្ទាប់លើនាវាយោធា និងពាណិជ្ជកម្មបរទេស នៅក្នុងតំបន់។

គ្រឿងយុទ្ធោបករណ៍របស់សហរដ្ឋអាមេរិកតាមដាននាវា ដែលជាកម្មសិទ្ធិរបស់កងកម្លាំងដែនសមុទ្រពីររបស់អ៊ីរ៉ង់គឺកងទ័ពជើងទឹកធម្មតារបស់ខ្លួន និងកងនាវាចរឆ្មាំបដិវត្តន៍ឥស្លាម (IRGCN) អស់រយៈពេលជាច្រើនថ្ងៃ ក្នុងខែកញ្ញា។ ទីបញ្ជាការកណ្តាលនៃកងកម្លាំងទ័ពជើងទឹកអាមេរិក ឬ NAVCENT បាននិយាយថា បេសកកម្មនេះ បានកើតឡើង «ក្នុងអំឡុងពេលល្បាតជាប្រចាំ» នៅក្នុង និងជុំវិញច្រកសមុទ្រ Hormuz ដែលជាផ្លូវទឹកយុទ្ធសាស្ត្ររវាងឈូងសមុទ្រពែក្ស និងឈូងសមុទ្រអូម៉ង់។

NAVCENT បាននិយាយនៅក្នុងសេចក្តីថ្លែងការណ៍មួយថា៖«ប្រតិបត្តិការនេះ បានជំរុញវត្តមាននៅក្នុង និងជុំវិញចំណុចសំខាន់មួយ ដែលក្នុងរយៈពេលប៉ុន្មានខែថ្មីៗនេះ បានមើលឃើញថា ប្រទេសអ៊ីរ៉ង់ បានរឹបអូសនាវាពាណិជ្ជករ ដែលមានទង់ជាតិអន្តរជាតិដោយខុសច្បាប់» ដោយបន្ថែមថា យានមុជទឹកគ្មានមនុស្សបើក (UUVs) យានរត់លើសមុទ្រគ្មានមនុស្សបើក (USVs) និង យានអាកាសគ្មានមនុស្សបើក(UAVs) ត្រូវបានរួមបញ្ចូលទាំងអស់។