ក្រុមអាជ្ញាធរជួយសង្រ្គោះគ្រោះមហន្តរាយ បាននិយាយថា ចំនួន​មនុស្ស​ស្លាប់​ពី​ការ​រញ្ជួយ​ដី​នៅតំ​បន់​ភាគ​ខាងលិចប្រទេសអាហ្វហ្គានីស្ថាន បានកើនឡើងដល់ ១២០នាក់ ក្នុងនោះមនុស្ស ១ពាន់​នាក់​បន្ថែម​ទៀត បានរងរបួស ស្របពេលដែលក្រុមគ្រួសារ បានកាយគំនរ​បាក់​បែក​ដើម្បី​ជួយ​សង្រ្គោះ​សាច់ញាតិ​ដែលជាប់ខ្លួនរបស់ពួកគេ ។

មន្ទីរភូគព្ភសាស្រ្តសហរដ្ឋអាមេរិក បាននិយាយថា ចំណុចកណ្តាលនៃការរញ្ជួយដីកម្រិត ៦.៣​រ៉ិចទ័រ ស្ថិតនៅចម្ងាយ ៤០គ.មភាគពាយ័ព្យខេត្ត Herat ហើយ​បន្ទាប់​មក​កើត​មាន​រលក​រញ្ជួយ​ចំនួន ៨លើកដែលមានកម្រិតចន្លោះពី ៤.៣រ៉ិចទ័រ និង ៦.៣រ៉ិចទ័រ ។

នៅ​ពេលយប់មកដល់ក្នុងភូមិ Sarboland នៃស្រុក Zinda Jan ស្ថិតនៅខេត្តជនបទ Herat អ្នក​ធ្វើ​សេចក្តី​រាយការណ៍របស់ទីភ្នាក់ងារព័ត៌មាន AFPបានមើលឃើញផ្ទះជាច្រើនខ្នង បានរាបដល់ដី ស្ថិត​នៅ​ជិតចំណុចកណ្តាលនៃការរញ្ជួយដី ។

ក្រុម​មនុស្សប្រុស បានប្រើប៉ែល ដើម្បីកាយគំនរបាក់បែក ខណៈស្រ្តី និងក្មេងៗ ឈរចាំខាងក្រៅ ដើម្បីរង់ចាំទទួលដំណឹងសាច់ញាតិដែលបាត់ខ្លួនរបស់ពួកគេ ។

លោក ​Bashir Ahmad វ័យ ៤២ឆ្នាំនិយាយថា មាននូវសំឡេងឮខ្លាំងណាស់ ហើយ​នៅ​ពេល​ការ​រញ្ជួយ​ដី​ដំបូង ផ្ទះទាំងអស់បានរាបដល់ដី ។

លោក​បន្តថា អ្នកដែលនៅក្នុងផ្ទះ ពួកគេបានជាប់ក្រោមគំនរបាក់បែក ។ មាន​នូវ​សាច់​ញាតិ​ដែល​ពួក​យើង​ពុំទាន់ទទួលបានដំណឹងពីពួកគេ ៕