ក្រុមសកម្មប្រយុទ្ធអ៊ីស្លាមហាម៉ាស (ប៉ាឡេស្ទីន) បានបើក​ការ​វាយ​ប្រហារ​ដ៏ធំបំផុតមួយ​មិនធ្លាប់​មាន​ក្នុង​រយៈពេលជាច្រើនឆ្នាំ ទៅលើប្រទេសអ៊ីស្រាអែល នៅក្នុងតំបន់ហ្កាហ្សា កាលពីថ្ងៃសៅរ៍ (៧ តុលា) ហើយបណ្ដាប្រទេសជាច្រើននៅលើពិភពលោក មាន​ការ​ផ្ទុះ​ប្រតិកម្ម​ជុំវិញ​ជម្លោះ​នេះ​។

ក្រសួងការបរទេសសហរដ្ឋអាមេរិកបាននិយាយថា «មិនមា​ន​ហេតុ​ផល​សម​ស្រប​ណាមួយ​សម្រាប់​ការ​ប្រព្រឹត្តអំពើភេរវកម្មនោះទេ ហើយយើងឈរក្នុងសាមគ្គីភាពជាមួយរដ្ឋាភិបាល និង​ប្រជាជន​អ៊ីស្រាអែល និងសូមចូលរួមរំលែកទុក្ខយ៉ាងក្រៀមក្រំ ចំពោះ​ជីវិត​ប្រជាជន​អ៊ីស្រាអែល​ដែល​បាន​បាត់បង់នៅក្នុងការវាយប្រហារទាំងនេះ។

បេសកជនសន្តិភាពមជ្ឈិមបូព៌ារបស់អង្គការសហប្រជាជាតិ លោក Tor Wennesland បាន​និយាយ​ថា «នេះគឺជាស្ថានភាពដ៏គ្រោះថ្នាក់ ហើយយើង​សូម​អំពាវនាវ​ដល់​ភាគី​ជម្លោះ​ទាំង​អស់​ឱ្យ​ដក​ថយ​ចេញ​ពី​ជ្រោះ​ជ្រៅ​ដ៏គ្រោះថ្នាក់នៅខាងមុខនេះ»។

ទីភ្នាក់ងារសារព័ត៌មានផ្លូវការ WAFA បានដកស្រង់ប្រសាសន៍ប្រធានាធិបតីប៉ាឡេស្ទីន លោក Mahmoud Abbas ដោយបាននិយាយថា ប្រជាជនប៉ាឡេស្ទីនមានសិទ្ធិការពារខ្លួនប្រឆាំងនឹង «ភេរវករនៃអ្នកតាំងទីលំនៅ និងក្រុមកងទ័ពកាន់កាប់តំបន់ផងដែរ»។

ចំណែក​នៅ​ប្រទេសអ៊ីរ៉ង់វិញ ទីប្រឹក្សារបស់មេដឹកនាំកំពូលរបស់អ៊ីរ៉ង់ លោក Ali Khamenei កាល​ពី​​ថ្ងៃសៅរ៍ បានអបអរសាទរដល់ក្រុមអ្នកប្រយុទ្ធប៉ាឡេស្ទីន សម្រាប់​ការ​វាយ​ប្រហារ​លើ​អ៊ីស្រាអែល នេះបើយោងតាមគេហទំព័រសារព័ត៌មានពាក់កណ្តាលផ្លូវការ ISNA បានរាយការណ៍ ហើយ​បាន​ដកស្រង់សម្តីលោកទីប្រឹក្សា Yahya Rahim Safavi ថា «យើងនឹ​ង​គាំ​ទ្រ​ក្រុម​អ្នក​ប្រយុទ្ធ​ប៉ាឡេស្ទីន រហូតដល់ការរំដោះដែនដីប៉ាឡេស្ទីន និងទីក្រុងយេរូសាឡឹម»។

លើស​ពី​នោះទៅទៀត មានប្រតិកម្មជាច្រើនផ្សេងទៀត ជុំវិញជម្លោះមួយនេះ ដែលក្នុងនោះមានដូចជា ប្រទេសអាល្លឺម៉ង់ បារាំង អារ៉ាប៊ីសាអូឌីត អេហ្ស៊ីប កាណាដា អង់គ្លេស សហភាពអឺរ៉ុប ទួរគី កាតា រុស្ស៊ី អ៊ុយក្រែន ព្រមទាំងប្រទេសជាច្រើនទៀត។ ពួកគេទាំងនោះ បានថ្កោលទោសយ៉ាងខ្លាំងក្លា ចំពោះការវាយប្រហារភេរវកម្មបច្ចុប្បន្នរបស់ក្រុមហាម៉ាស ប្រឆាំង​នឹង​អ៊ីស្រាអែល ដោយអំពាវនាវឱ្យមានការអត់ធ្មត់ពីគ្រប់ភាគី និងគាំទ្រ​យ៉ាង​ពេញ​ទំហឹង​ចំពោះ​សិទ្ធិការពារខ្លួនរបស់អ៊ីស្រាអែល ផងដែរ៕