ទីភ្នាក់ងារពន្ធនាគារបាននិយាយថា បុរស៧នាក់ ដែលត្រូវ​បាន​សង្ស័យ​ថា​ជាប់​ពាក់ព័ន្ធ​ក្នុង​ឃាតកម្ម​កាល​ពីខែសីហា របស់បេក្ខជនប្រធានាធិបតីប្រឆាំងអំពើពុករលួយរបស់អេក្វាឌ័រ លោក Fernando Villavicencio ត្រូវបានសម្លាប់នៅក្នុងពន្ធនាគារកាលពីថ្ងៃសុក្រ (៦ តុលា) រយៈ​ពេល​ត្រឹម​តែមួយសប្តាហ៍ប៉ុណ្ណោះ មុនពេលការបោះឆ្នោតដ៏សំខាន់មួយ។

ជនរងគ្រោះ ៦នាក់ត្រូវបានសម្លាប់នៅពន្ធនាគារ Litoral Penitentiary ក្នុងទីក្រុង Guayaquil កាលពីថ្ងៃសុក្រ និងម្នាក់ទៀតត្រូវបានសម្លាប់នៅក្នុងពន្ធនាគារទីក្រុងគីតូ កាលពីថ្ងៃសៅរ៍។ ប្រធានា​ធិបតីអេក្វាឌ័រ លោក Guillermo Lasso បានប្រកាសកាលពីថ្ងៃសៅរ៍ អំពី​ការ​ដក​តំណែង​មន្ត្រី​ពីររូ​ប គឺប្រធានពន្ធនាគារ និងប្រធានអង្គភាពស៊ើបអង្កេតរបស់នគរបាល។

ការិយាល័យអគ្គមេធាវីរបស់ប្រទេសអេក្វាឌ័រ ក៏បានបើកការ​ស៊ើប​អង្កេត​ទៅ​លើ​ទីភ្នាក់​ងារ​ពន្ធនាគារ​​របស់ប្រទេសនេះផងដែរ ដោយសារតែទីភ្នាក់ងារពន្ធនាគារ SNAI មួយនេះ មិនបានអនុវត្តដីកាសម្រេច ក្នុងការផ្ទេរជនសង្ស័យមួយរូបចុងក្រោយចេញ សម្រាប់​ហេតុ​ផល​សុវត្ថិភាព​ដែលថា អ្នកទោសទាំងប្រាំមួយនាក់ ត្រូវបានសម្លាប់នៅពន្ធនាគារ Litoral Penitentiary កាលពីថ្ងៃសុក្រនោះទេ។

គួររម្លឹកផងដែរថា លោក Villavicencio ដែលធ្លាប់ជាអ្នកសារព័ត៌មានដ៏លេចធ្លោម្នាក់ ដោយ​បាន​លាត​ត្រដាង​អំពើ​ពុករលួយ និងឧក្រិដ្ឋកម្មមានអង្គការចាត់តាំង ត្រូវបានខ្មាន់កាំភ្លើងបាញ់សម្លាប់ ខណៈ​ពេលចាកចេញពីព្រឹត្តិការណ៍យុទ្ធនាការបោះឆ្នោតមួយ កាលពីខែសីហា៕