ដើម្បីចូលរួមបង្ការ និងត្រៀមជួយសង្គ្រោះប្រជាពលរដ្ឋដែលងាយរងគ្រោះ និង​មាន​ហានិភ័យ​ខ្ពស់​ដោយ​គ្រោះទឹកជំនន់នៃទន្លេ ស្ទឹង និងទឹក​ជំនន់​ដោយ​ទឹក​ភ្លៀង​នៅ​តំបន់មួយ​ចំនួន​ក្នុង​ភូមិ​សាស្ត្រ​រាជ​ធានី​ភ្នំពេញ ព្រមទាំងធានាបាននូវសុខុមាលភាពល្អប្រសើរជូនប្រជាពលរដ្ឋ រដ្ឋបាល​រាជ​ធានី​ភ្នំពេញ​ ក្នុងនាម​គណៈកម្មាធិការ​គ្រប់​គ្រង​គ្រោះ​មហន្តរាយ​រាជ​ធានី​ភ្នំពេញ​បាន​ចេញ​នូវ​សេចក្ដី​ណែនាំ​មួ​យច្បាប់នៅថ្ងៃទី០៩ ខែតុលា ឆ្នាំ២០២៣ ដល់អាជ្ញាធរ កងកម្លាំង មន្ទីរជំនាញពាក់ព័ន្ធ និង​ប្រជាពលរដ្ឋឱ្យត្រៀមវិធានការទប់ទល់នឹងគ្រោះទឹកជំនន់។

គណៈកម្មាធិការគ្រប់គ្រងគ្រោះមហន្តរាយរាជធានីភ្នំពេញបានណែនាំដល់រដ្ឋបាលខណ្ឌទាំង ១៤ ជា​ពិសេសរដ្ឋបាលខណ្ឌដង្កោ ខណ្ឌកំបូល ខណ្ឌព្រែកព្នៅ ខណ្ឌឫស្សីកែវ ខណ្ឌជ្រោយចង្វារ និង​ខណ្ឌ​ច្បារអំពៅ កំណត់ទីទួលសុវត្ថិភាព ដើម្បីត្រៀមជម្លៀសប្រជាពលរដ្ឋ ដោយ​ធ្វើ​ការ​សហការ​ជា​មួយ​មន្ទីរ-អង្គភាពជំនាញពាក់ព័ន្ធ និងណែនាំ​ផ្សព្វ​ផ្សាយ​ជូន​ប្រជាពលរដ្ឋឱ្យ​បាន​ជ្រាប​នូវ​ទីទួល​សុវត្ថិភាព ព្រមទាំងរៀបចំក្រុមវេនយាមប្រចាំការនៅតាមអង្គភាពរបស់ខ្លួន ដើម្បីក្តាប់ព័ត៌មាន ត្រៀម​អន្តរាគមន៍។ ចំពោះស្នងការដ្ឋាននគរបាលរាជធានីភ្នំពេញ បញ្ជាការដ្ឋាន​កង​រាជ​អាវុធ​ហត្ថ​រាជ​ធានី​ភ្នំពេញ និងបញ្ជាការដ្ឋានយោធភូមិភាគពិសេស ត្រូវត្រៀមកម្លាំង មធ្យោបាយដឹកជញ្ជូន រថយន្ត ទូក កាណូត អូប័រ និងសម្ភារៈផ្សេងៗ ដើម្បីជួយ​អន្តរាគមន៍​សង្គ្រោះ​ប្រជាពលរដ្ឋ​រង​គ្រោះ​ដោយ​ទឹក​ជំនន់។

តាមមន្ទីរជំនាញពាក់ព័ន្ធក៏ត្រូវបានណែនាំឱ្យតាមដានព្យាករណ៍ឧតុនិយមជាប្រចាំ ដើម្បីធ្វើការ​ជូន​ដំណឹង​ដល់ប្រជាពលរដ្ឋ រដ្ឋបាលខណ្ឌ រដ្ឋបាលសង្កាត់ និងមន្ទីរជំនាញពាក់ព័ន្ធ ក៏ត្រូវ​ត្រៀម​រៀប​​​ចំផែនការការពារសុខភាព រថយន្តគិលានសង្គ្រោះ ឧបករណ៍-សម្ភារៈសុខាភិបាល និងថ្នាំ​សង្កូវ​ផ្សេងៗ ដើម្បីផ្តល់សេវាសុខាភិបាលផ្សេងៗជូនប្រជាពលរដ្ឋ។ សម្រាប់​វិស័យ​អប់រំ​ត្រូវ​សុំ​គោល​ការណ៍អនុញ្ញាតពីក្រសួងអប់រំ យុវជន និងកីឡា ដើម្បីត្រៀមផ្អាកដំណើរការ គ្រឹះស្ថាន សិក្សាជាបណ្ដោះអាសន្ន សម្រាប់គ្រឹះស្ថានសិក្សាដែលត្រូវរងគ្រោះដោយទឹកជំនន់ និងធ្វើការ ផ្ទេរសិស្សានុសិស្សទៅរៀននៅគ្រឹះស្ថានសិក្សាផ្សេងជាបណ្ដោះអាសន្ន ដើម្បីធានាសុវត្ថិភាព និង​និរន្តរភាពនៃការសិក្សា។

គណៈកម្មាធិការគ្រប់គ្រងគ្រោះមហន្តរាយរាជធានីភ្នំពេញក៏បានណែនាំប្រជាពលរដ្ឋដែលមានលំនៅឋាននៅតាមបណ្តោយដងទន្លេមេគង្គ និងដងស្ទឹងព្រែកត្នោត ត្រូវបង្កើនការប្រុងប្រយ័ត្នខ្ពស់ តាមដានព័ត៌មានជាប្រចាំអំពីកម្ពស់ទឹក និងត្រូវត្រៀមលក្ខណៈទុក ជាមុន ដូចជាទ្រព្យសម្បត្តិ សម្ភារៈចាំបាច់ និងសត្វពាហនៈឱ្យបានរៀបរយ ដើម្បីជម្លៀសទៅ ទីទួលសុវត្ថិភាព៕ អត្ថបទ ៖ ប្រាក់ វ៉ាន់ដា