ស្ទឹងត្រែង ៖ ក្រុមគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចំនួន៨៩នាក់ បានចុះអប់រំសុខភាព បណ្តុះបណ្តាលវគ្គសង្រ្គោះបឋម ព្រមទាំងពិនិត្យ ព្យាបាលជំងឺ និងចែកឱសថ ជូនបងប្អូនប្រជាពលរដ្ឋដោយឥតគិតថ្លៃ និងបន្តយុទ្ធនាការចាក់វ៉ាក់សាំងបង្ការកូវីដ-១៩ ខេត្តស្ទឹងត្រែង នាថ្ងៃទី៨ ខែតុលា ឆ្នាំ២០២៣។

ឯកឧត្តម លេង ផាលី សមាជិកគណៈអចិន្ត្រៃយ៍គណៈកម្មាធិការកណ្តាលសហភាពសហព័ន្ធយុវជនកម្ពុជា ទទួលបន្ទុកប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី បានថ្លែងថា ដោយមានការចង្អុលបង្ហាញដ៏ខ្ពង់ខ្ពស់ពីឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានកិត្តិយសក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី   បាននាំយកអំណោយថ្នាំពេទ្យដ៏ថ្លៃថ្លារបស់ឯកឧត្តម ហ៊ុន ម៉ានី ចុះមកពិនិត្យ និងព្យាបាលជំងឺ ចែកថ្នាំជូនប្រជាពលរដ្ឋដោយឥតគិតថ្លៃព្រមទាំងចុះយុទ្ធនាការចាក់វ៉ាក់សាំងកូវីដ-១៩ ដូសទី១ ដូសទី២ ដូសទី៣ ដូសទី៤ ដូសទី៥ និងដូសទី៦ ក្នុងក្របខណ្ឌទូទាំងប្រទេស ដោយឥតគិតថ្លៃ និងឥតគិតថវិកាបេសកកម្ម រួមទាំងប្រជាពលរដ្ឋ ចូលរួមចំនួន១២៨៩នាក់ នៅស្រុកបុរីអូរស្វាយសែនជ័យ ខេត្តស្ទឹងត្រែង។ ក្នុងរយៈពេល ១១ឆ្នាំ (០២ ធ្នូ ឆ្នាំ២០១២ ដល់ ០៨ តុលា ឆ្នាំ២០២៣) ក្រោមការដឹកនាំដ៏ខ្ពង់ខ្ពស់ដោយផ្ទាល់ ការចង្អុលបង្ហាញជាប្រចាំ ប្រកបដោយទស្សនវិស័យវែងឆ្ងាយ និងប្រាកដប្រជាគួរឱ្យគោរពកោតសរសើររបស់ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានកិត្តិយសក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ដែលមានក្រុមគ្រូពេទ្យចំនួន ១២,០៦៩នាក់ (មួយម៉ឺន ពីរពាន់ ហុកសិប ប្រាំបួននាក់) ក្នុងនោះស្ត្រីមានចំនួន ៦,៤៩៥នាក់ (ប្រាំមួយពាន់បួនរយកៅសិបប្រាំនាក់) ដឹកនាំនិងសម្របសម្រួលដោយឯកឧត្តម លេង ផាលី រដ្ឋលេខាធិការក្រសួងផែនការ ជាសមាជិកគណៈអចិន្ត្រៃយ៍គណៈកម្មាធិការកណ្តាលសហភាពសហព័ន្ធយុវជនកម្ពុជា និងជាប្រធានប្រតិបត្តិក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានបំពេញបេសកកម្មដ៏ថ្លៃថ្លាដោយទទួលបានលទ្ធផលប្រកបដោយប្រសិទ្ធភាព និងប្រសិទ្ធផលជាច្រើនឥតគណនា ក្នុងការចូលរួមអប់រំផ្សព្វផ្សាយ ចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស សង្គ្រោះបឋម យកសំណាករកវីរុសកូវីដ-១៩ និងពិនិត្យ ព្យាបាលជំងឺ ជូនប្រជាពលរដ្ឋដោយឥតគិតថ្លៃ ក្នុង២៥រាជធានី- ខេត្ត នៃព្រះរាជាណាចក្រកម្ពុជា បានចំនួន១៤៤៣លើក ព្យាបាលជំងឺជូនប្រជាពលរដ្ឋបានចំនួន ១២,២១៨,៣៧១នាក់ (ដប់ពីរលាន ម្ភៃមួយម៉ឺនប្រាំបីពាន់ បីរយចិតសិបមួយនាក់) ក្នុងនោះស្ត្រីមានចំនួន ៦,២៧៥,៨៩៤នាក់ (ប្រាំមួយលាន ម្ភៃប្រាំពីរម៉ឺនប្រាំពាន់ ប្រាំបីរយកៅសិបបួននាក់) គិតត្រឹមថ្ងៃទី០៨ ខែតុលា ឆ្នាំ២០២៣ បានចំនួន២ ភាគ៣ នៃប្រជាជនសរុបទូទាំងប្រទេស ដែលមានចំនួន ១៧,០៩១,៤៦៤នាក់ (ដប់ប្រាំពីរលាន ប្រាំបួនម៉ឺន មួយពាន់បួនរយហុកសិបបួននាក់) ធៀបនឹងឆ្នាំ២០២៣ ទទួលបានការពិនិត្យ ព្យាបាល និងចែកថ្នាំជូនដោយឥតគិតថ្លៃពីក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី។ ជាពិសេសទៅទៀតក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចំនួន៤,៦០១នាក់ បាននិងកំពុងចុះយុទ្ធនាការចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេសដោយឥតគិតថ្លៃ និងឥតគិតថវិកាបេសកកម្ម ដោយចាក់ជូនប្រជាពលរដ្ឋបានប្រមាណ ១០,៩៦៤,៣៩៨ដូស (ដប់លាន កៅសិបប្រាំមួយម៉ឺនបួនពាន់ បីរយកៅសិបប្រាំបី ដូស) ក្នុង២៥រាជធានី-ខេត្ត ដោយមានកិច្ចសហការជាមួយសាខាសកម្មជនក្រុមការងាយុវជនរាជធានីភ្នំពេញ សហភាពសហព័ន្ធយុវជនកម្ពុជា យុវជនកាកបាទក្រហមកម្ពុជា យុវជនកាយរិទ្ធិកម្ពុជា ក្រុមការងាររាជរដ្ឋាភិបាលចុះជួយរាជធានី-ខេត្ត មន្ទីរសុខាភិបាលខេត្ត និងអាជ្ញាធរគ្រប់ជាន់ថ្នាក់។ បើគិតសេវាជាមធ្យម ប្រជាពលរដ្ឋក្នុងម្នាក់ ចំណាយអស់ ៥០ដុល្លារ សរុបត្រូវចំណាយទាំងអស់ប្រហែល ៦១០,៩១៨,៥៥០ដុល្លារ (ប្រាំមួយរយដប់លានកៅសិបមួយម៉ឺនប្រាំបីពាន់ហាសិបដុល្លារសហរដ្ឋអាមេរិក)។

ឯកឧត្តម លេង ផាលី បានបញ្ជាក់ថា ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ប្រចាំខេត្តស្ទឹងត្រែង មានចំនួនជាង៣០០នាក់ បានធ្វើការពិនិត្យ ព្យាបាលជំងឺជូនប្រជាពលរដ្ឋ បានចំនួន២៤៩លើក ចំណែកក្នុងស្រុកបុរីអូរស្វាយសែនជ័យនេះ ក៏ជាលើកទី២ហើយ ទន្ទឹមនឹងនោះប្រជាពលរដ្ឋពិតជាមានសំណាងខ្លាំងណាស់ដែលមានក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី។ ដូច្នេះកាលណាយើងចូលរួមលើកកម្ពស់សុខមាលភាពរបស់ប្រជាពលរដ្ឋបានល្អប្រសើរ គឺសម្រេចបានគោលដៅអភិវឌ្ឍន៍ប្រកបដោយចីរភាព ដែលអង្គការសហប្រជាជាតិ កំពុងគាំទ្រដល់ព្រះរាជាណាចក្រកម្ពុជា ការលុបបំបាត់ភាពក្រីក្រគ្រប់ទម្រង់ និងគ្រប់ទំហំ។

ជាមួយគ្នានោះដែរលោក ស្វាយ ពុទ្ធារ៉ា អភិបាលរងស្រុក បុរីអូរស្វាយសែនជ័យ តំណាងឯកឧត្តម ស្វាយ សំអ៊ាង អភិបាលខេត្ត ស្ទឹងត្រែង រួមនឹងសមាជិកសហភាពសហព័ន្ធយុវជនកម្ពុជាស្រុក និងប្រជាពលរដ្ឋសូមគោរពកោតសរសើរខ្ពស់ចំពោះ​ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី តែងតែមានសកម្មភាពយ៉ាងសកម្មចុះជួយពិនិត្យ ព្យាបាលជំងឺជូនប្រជាពលរដ្ឋដោយឥតគិតថ្លៃ ដែលជាអំណោយដ៏ថ្លៃថ្លារបស់ឯកឧត្តម ហ៊ុន ម៉ានី និងចាក់វ៉ាក់សាំងបង្ការកូវីដ-១៩ ដោយឥតគិតថ្លៃ និងឥតគិតថវិកាបេសកកម្មជាច្រើនលើកច្រើនសារក្នុងខេត្តស្ទឹងត្រែង។ សកម្មភាពនេះជាលើកទី២ ហើយក៏ជាព្រឹតិ្តការណ៍ប្រវតិ្តសាស្រ្តផងដែរ សម្រាប់រដ្ឋបាលស្រុកបុរីអូរស្វាយសែនជ័យ ដោយសាររដ្ឋបាលស្រុក ទើបតែបង្កើតថ្មី ក្នុងកំឡុងរយៈពេលប្រហែលជាង៤ឆ្នាំ(២០១៩-២០២៣) និងដោយសារមានកិច្ចខិតខំប្រឹងប្រែងរបស់ថ្នាក់ដឹកនាំគ្រប់លំដាប់ថ្នាក់ ធ្វើឲ្យការអភិវឌ្ឍន៍ក្នុងមូលដ្ឋានរបស់ស្រុកបុរីអូរស្វាយសែនជ័យ ស្ថិតនៅជាប់ព្រំដែនឡាវ មានការអភិវឌ្ឍ និងរីកចម្រើន និងពាក់ព័ន្ធទៅលើផ្នែកសុខភាព អនាម័យ និងការចូលរួមទប់ស្កាត់ នៃការរីករាលដាលជំងឺកូវីដ-១៩ គឺក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានយកចិត្តទុកដាក់ជួយប្រជាពលរដ្ឋរស់នៅក្នុងតំបន់ដាច់ស្រយាល បានមកពិនិត្យ ព្យាបាល និងទទួលឱសថដោយមិនគិតថ្លៃ ហើយការចូលរួមរបស់ប្រជាពលរដ្ឋ ទាំងលើកទី១ និងលើកទី២ មានការសាទរមែនទែន និងបានបង្ហាញយ៉ាងច្បាស់ថា កម្ពុជា កំពុងតែបោះជំហ៊ានទៅមុខជានិច្ច លើការងារផ្តល់ការចាក់វ៉ាក់សាំងជូនប្រជាពលរដ្ឋដោយឥតគិតថ្លៃ ដើម្បីពង្រឹងភាពស៊ាំក្នុងសហគមន៍ កាត់បន្ថយហានីភ័យនៃការរាតត្បាតដោយជំងឺកូវីដ-១៩៕ អត្ថបទ៖ រដ្ឋា