ហ្វីលីពីន៖ ក្រុមមន្ត្រីបាននិយាយកាលពីថ្ងៃពុធ ទី២ ខែមិថុនាថា ព្យុះតំបន់ត្រូពិកបានឆក់យកជីវិតមនុស្ស ៣នាក់ និងបង្ខំឲ្យអ្នកភូមិរាប់រយនាក់ ជម្លៀសចេញពីលំនៅឋាននៅក្នុងភាគខាងត្បូង និងកណ្ដាលរបស់ប្រទេសហ្វីលីពីន ជាទីដែលព្យុះនេះបានបង្កឲ្យមានទឹកជំនន់ និងបំណាក់ដី។
ក្រុមអ្នកព្យាករណ៍បាននិយាយថា ព្យុះ Choi-wan ស្ថិតនៅភាគនិរតីនៃខេត្ត Masbate ភាគកណ្ដាលកាលពីព្រឹកថ្ងៃពុធ ដែលនាំមកជាមួយនូវកម្លាំងខ្យល់ ៦៥គីឡូម៉ែត្រក្នុងមួយម៉ោង និងល្បឿនខ្យល់បក់រហូតដល់ ៩០គីឡូម៉ែត្រក្នុងមួយម៉ោង។ ពួកគេបាននិយាយថា ព្យុះនេះកំពុងបោះពួយទៅភាគពាយព្យ និងអាចចុះខ្សោយកម្លាំងនៅពេលបក់បោកឆ្ពោះ ទៅសមុទ្រចិនខាងត្បូងនៅថ្ងៃព្រហស្បតិ៍នេះ។ មានមនុស្សយ៉ាងហោចណាស់ ៣នាក់បានស្លាប់រួមទាំងអ្នកភូមិអាយុ ១៤ឆ្នាំម្នាក់ ដែលបានព្យាយាមហែលជាមួយឪពុករបស់នាង ទៅកាន់ច្រាំងទន្លេដើម្បីជួយសង្គ្រោះសត្វ ក្នុងកសិដ្ឋានរបស់ពួកគេនៅពេលមានភ្លៀងធ្លាក់ខ្លាំង ប៉ុន្តែត្រូវបានទឹកដែលកំពុងហូរខ្លាំងកួចចូលក្នុងទឹកទន្លេនៅទីក្រុង Norala ក្នុងខេត្ត Cotabato ភាគខាងត្បូង។ ការិយាល័យការពារជនស៊ីវិលបាននិយាយថា ឪពុករបស់នាងនៅតែបាត់ខ្លួននៅឡើយ។
ប្រជាជនជាង ២.៦០០នាក់ត្រូវបានជម្លៀសចេញពីលំនៅឋាន ភាគច្រើនដោយសារតែទឹកជំនន់នៅក្នុងភូមិចំនួន ១៨ នៅភាគខាងត្បូងប្រទេស ក្នុងនោះមានអ្នកភូមិប្រមាណ ៦០០នាក់ដែលបានជម្លៀសទៅស្នាក់នៅបណ្ដោះអាសន្ន នៅមជ្ឈមណ្ឌលជម្លៀស។ ក្រុមមន្ត្រីបាននិយាយថា ត្រូវការកន្លែងទំនេរបន្ថែមទៀតដើម្បីផ្ដល់ជម្រកដល់អ្នកជម្លៀស ជាវិធានការទប់ស្កាត់ការឆ្លងវីរុសកូរ៉ូណា៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
