ប្រទេសអាល្លឺម៉ង់ នឹងមានផែនការបង្កើនសមត្ថភាពការពារដែនអាកាសរបស់អ៊ុយក្រែនក្នុងរដូវរងារនេះ ដោយផ្តល់នូវកញ្ចប់ឧបករណ៍ ដែលបានសន្យា ដែលមានតម្លៃប្រហែល មួយពាន់លានអឺរ៉ូ (១.១ពាន់លានដុល្លារ) រួមទាំងប្រព័ន្ធការពារដែនអាកាស Patriot បន្ថែម ដើម្បីជួយការពារហេដ្ឋារចនាសម្ព័ន្ធសំខាន់ៗ។

ក្រសួងការពារជាតិ បាននិយាយនៅក្នុងសេចក្តីថ្លែងការណ៍តាមអ៊ីមែល នៅថ្ងៃអង្គារនេះថា រដ្ឋាភិបាលរបស់លោកអធិការបតី អូឡាហ្វ សូល ( Olaf Scholz) ក៏នឹងផ្គត់ផ្គង់ប្រព័ន្ធការពារដែនអាកាស IRIS-T ដែលបានសន្យាចំនួនពីរបន្ថែមទៀតនៅក្នុងខែនេះ រួមជាមួយនឹមីស៊ីលតម្រង់គោលដៅបញ្ជាពីចម្ងាយ។ កញ្ចប់នេះ រួមមានរថក្រោះប្រយុទ្ធ Leopard A1 ចំនួន ១០គ្រឿងបន្ថែមទៀត កាំភ្លើងដាក់គងលើស្មារសម្រាប់បាញ់យន្តហោះ Gepard ចំនួន ៣ដើម និងការផ្គត់ផ្គង់គ្រាប់កំាភ្លើង ១៥៥មីលីម៉ែត្រ ក្នុងរយៈពេលប៉ុន្មានសប្តាហ៍ខាងមុខនេះ។

រដ្ឋមន្ត្រីការពារជាតិលោក បូរីស ភីស្តូរៀស (Boris Pistorius) បាននិយាយនៅមុនកិច្ចប្រជុំជាមួយសមភាគីណាតូនៅទីក្រុងប្រ៊ុចសែល នៅថ្ងៃពុធនេះថា៖«ជាមួយនឹង «កញ្ចប់ជំនួយរដូវរងា» ថ្មីនេះ យើងកំពុងបង្កើនការត្រៀមខ្លួនប្រតិបត្តិការរបស់កងកម្លាំងប្រដាប់អាវុធអ៊ុយក្រែនបន្ថែមទៀត។

ប្រទេសល្លឺម៉ង់ គឺជាអ្នកគាំទ្រដ៏សប្បុរសបំផុតរបស់អ៊ុយក្រែននៅក្នុងទ្វីបអឺរ៉ុប ដោយផ្តល់ជំនួយផ្នែកហិរញ្ញវត្ថុ និងមនុស្សធម៌រាប់ពាន់លានអឺរ៉ូ ព្រមទាំងបានបញ្ជូនគ្រឿងយុទ្ធោបករណ៍ជាច្រើនរួមទាំងរថពាសដែកប្រយុទ្ធ រថក្រោះប្រយុទ្ធLeopard និងកាំភ្លើងផ្លោងស្វ័យប្រវត្តិ។