កម្មករកម្មការិនីរោងចក្រជាបណ្តើរៗហើយ បាននាំ​គ្នាចេញ​ដំណើរទៅ​កាន់​ស្រុក​កំណើត​រៀង​ៗខ្លួន​ ដើម្បី​ជួបជុំគ្រួសារ ញាតិសន្តាន និងមិត្តភ័ក្តិ នៅក្នុងឱកាសពិធីបុណ្យភ្ជុំបិណ្ឌ ខណៈ​កម្មករ​និយោជិត​មួយចំនួនផ្សេងទៀតបន្តធ្វើការងារ។

កម្មការិនី សំអ៊ន មានស្រុកកំណើតនៅស្រុកកណ្តាលស្ទឹង ខេត្តកណ្តាល បាន​និយាយ​ប្រាប់​ទូរទស្សន៍​ព័ត៌មាន ប៊ីធីវី ឲ្យដឹងថា ក្នុងឱកាសពិធីបុណ្យភ្ជុំបិណ្ឌឆ្នាំនេះ រោងចក្រ​អនុញ្ញាត​ឲ្យ​ឈប់​សម្រាក​រយៈពេល ៥ថ្ងៃ ចាប់ពីថ្ងៃទី១២ ដល់១៦ ខែតុលា ឆ្នាំ២០២៣។ កម្មការិនីបានឲ្យដឹងទៀតថា ឆ្នាំនេះក្រៅពីជួបជុំគ្រួសារ និងនាំយកចង្កាន់ប្រគេនព្រះសង្ឃ ក្រុម​គ្រួសារ​កញ្ញាទាំងអស់ នឹងបន្តដំណើរកម្សាន្តនៅខេត្តកំពត ដើម្បីសម្រាកលំហែកាយ។

ចំណែកកម្មការិនីរោងចក្រកាត់ដេរសម្លៀកបំពាក់នៅខណ្ឌកំបូល និយាយដោយទឹកមុខញញឹមថា ពួក​គាត់​ពិតជាសប្បាយចិត្តណាស់ ដែលបានទៅលេងស្រុកកំណើត ព្រោះ​បាន​ទៅ​លេង​ឪពុក​ម្តាយ ​បងប្អូន និតមិត្តភ័ក្ត ដែលខកខានជួបជុំគ្នាយ៉ាងយូរ ដោយសារជាប់រវល់ការងារ។ កម្មការិនីរូបនេះលើកឡើងថា ការររស់នៅក្រុងភ្នំពេញសព្វថ្ងៃនេះ ពិតជារវល់ និង​មមា​ញឹក​ច្រើន​ក្នុង​ការ​បំពេញការងារ ដូច្នេះមិនសូវមានពេលទៅលេងស្រុកឡើយ លុះត្រាតែមានបុណ្យទាន ឬ​បុណ្យ​ជាតិ​ធំៗទើបអាចធ្វើដំណើរទៅបាន។

សូមបញ្ជាក់ទៀតថាជារៀងរាល់ឆ្នាំឲ្យតែពិធីបុណ្យធំៗ ដូចជា​បុណ្យ​ចូលឆ្នាំ​ប្រពៃ​ជាតិ​ខ្មែរ​បុណ្យ​ភ្ជុំបិណ្ឌ និងពិធីបុណ្យអុំទូកជាដើម ប្រជាពលរដ្ឋចំណាកស្រុករស់នៅភ្នំពេញ ក៏ដូច​ជា​កម្មករ​កម្មការនី​ជាច្រើនសិបនាក់តែងតែធ្វើដំណើរចេញ ដើម្បីជួបជុំក្រុមគ្រួសារ និងសាច់ញាតិ​នៅ​ស្រុក​កំណើត​រៀងៗខ្លួន៕ អត្ថបទ៖ ឈិត បូរ៉ាវី