នគរបាលប្រទេសបារាំង បានប្រើប្រាស់ឧស្ម័នបង្ហៀរទឹកភ្នែក និងកាណុងបាញ់ទឹក ដើម្បីបំបែកការប្រមូលផ្តុំដែលត្រូវបានហាមឃាត់ក្នុងការគាំទ្រប្រជាជនប៉ាឡេស្ទីន នៅទីក្រុងប៉ារីស កាលពីថ្ងៃព្រហស្បតិ៍ ខណៈប្រធានាធិបតីលោក Emmanuel Macron បានជំរុញឱ្យពលរដ្ឋបារាំង រក្សាការរួបរួម និងជៀសវាងការនាំយកជម្លោះអ៊ីស្រាអែលនិងក្រុមហាម៉ាស់មកក្នុងប្រទេស។
កាលពីពេលមុន រដ្ឋមន្ត្រីក្រសួងមហាផ្ទៃរបស់លោក Macron បានហាមឃាត់ការតវ៉ាគាំទ្រប៉ាឡេស្ទីន ដោយនិយាយថា ពួកគេទំនងជាបង្កើតការរំខានដល់សណ្តាប់ធ្នាប់សាធារណៈ។
ប្រទេសបារាំងគឺជាទីតាំងរបស់សហគមន៍មូស្លីម និងជនជាតិជ្វីហ្វច្រើនបំផុតនៅអឺរ៉ុប។ ជម្លោះមជ្ឈិមបូព៌ា បានបង្កភាពតានតឹងក្នុងតំបន់ជារឿយៗនាពេលកន្លងមក។ លោក Macron បានអំពាវនាវឱ្យជៀសវាង «ការបែកបាក់គ្នា» និងបាននិយាយថា រដ្ឋាភិបាលមានចំណាត់ការ ដើម្បីជំរុញការការពាររបស់នគរបាលលើទីតាំងរបស់ជនជាតិជ្វីហ្វ រួមទាំងសាលារៀន និងវិហារជនជាតិជ្វីហ្វ។ ទោះបីជាមានការហាមឃាត់ក៏ដោយ ក្រុមបាតុករគាំទ្រប៉ាឡេស្ទីនជាច្រើនរយនាក់ បានប្រមូលផ្តុំគ្នានៅទីក្រុងប៉ារីសភាគកណ្តាលជាក្រុមដាច់ដោយឡែកពីគ្នា ដែលកងកម្លាំងនគរបាលបានព្យាយាមរារាំងមិនឱ្យមកចូលគ្នា។
ក្រុមបាតុករបានស្រែកថា «ឃាតករអ៊ីស្រាអែល» និង «អ្នកសមគំនិត លោក Macron»។ កាលពីពេលមុន លោក Macron ធ្លាប់បានថ្កោលទោសការវាយប្រហារដ៏ឃោឃៅដោយក្រុមសកម្មប្រយុទ្ធហាម៉ាស់ប៉ាឡេស្ទីននិងបានបង្ហាញពីសាមគ្គីភាពជាមួយអ៊ីស្រាអែល។ កាលពីដើមសប្តាហ៍នេះ ក្រុមហាម៉ាស់ បានអំពាវនាវឱ្យមានបាតុកម្មនៅទូទាំងពិភពមូស្លីមនៅថ្ងៃសុក្រ នេះ ដើម្បីគាំទ្រប៉ាឡេស្ទីន។
បាតុកម្មគាំទ្រប៉ាឡេស្ទីនចំនួនពីរនៅទីក្រុងប៉ារីស ត្រូវបានហាមឃាត់រួចហើយកាលពីថ្ងៃព្រហស្បតិ៍សម្រាប់ការព្រួយបារម្ភនៃការផ្ទុះឡើង នៅពេលដែលរដ្ឋមន្ត្រីក្រសួងមហាផ្ទៃ លោក Gerald Darmanin បានប្រាប់អាជ្ញាធរឱ្យហាមឃាត់រាល់បាតុកម្មដែលគាំទ្រប៉ាឡេស្ទីននៅទូទាំងប្រទេស៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
