រដ្ឋមន្ត្រីហិរញ្ញវត្ថុមកពីក្រុមប្រទេសមានឧស្សាហកម្មរីកលូតលាស់ទាំង៧ ឬ G7 បាន​ចូល​រួម​ជាមួយ​ទេសាភិបាលធនាគារកណ្តាល ដើម្បីចេញ​សេចក្តីថ្លែង​ការណ៍​ថ្កោល​ទោស​អ្វី​ដែល​ពួក​គេ​ចាត់​ទុក​ថាជា​ «ការវាយប្រហារភេរវកម្ម» ដោយក្រុមហាម៉ាស។

រដ្ឋមន្ត្រីទាំងអស់ បានបង្ហាញពីសាមគ្គីភាពរបស់ពួកគេជាមួយប្រជាជនអ៊ីស្រាអែល។ ក្រុមមន្ត្រី បាន​ជួប​ពិភាក្សាកាលពីថ្ងៃព្រហស្បតិ៍នៅទីក្រុង Marrakech ប្រទេសម៉ារ៉ុក ក្រៅ​កិច្ច​ប្រជុំ​ប្រចាំ​ឆ្នាំ​របស់​មូល​និធិរូបិយវត្ថុអន្តរជាតិ(IMF) និងធនាគារពិភពលោក(WORLD BANK)។

រដ្ឋ​មន្ត្រីក្រសួងហិរញ្ញវត្ថុជប៉ុនលោក Suzuki Sunichi បានដឹកនាំកិច្ចពិភាក្សា។ លោក​បាន​និយាយ​ថា ការប្រយុទ្ធគ្នានេះពុំមែនជារបៀបវារៈដំបូងឡើយ ប៉ុន្តែលោកនិងក្រុមមន្ត្រី បាន​ចំណាយ​ពេល​ច្រើន​ ដើម្បីពិភាក្សាអំពីផលប៉ះពាល់ដែលអាចមានរួមទាំងទីផ្សារហិរញ្ញវត្ថុ និង​តម្លៃ​ថាមពល​។ លោកបាននិយាយបន្ថែមថា វាចូលដល់មួយសប្តាហ៍ហើយ ចាប់តាំង​ពី​ជម្លោះ​បាន​ផ្ទុះ​ឡើង​ ដូច្នេះលោក និងមេដឹកនាំផ្សេងទៀត នឹង​ផ្តោត​ការ​យក​ចិត្ត​ទុក​ដាក់​យ៉ាង​ខ្លាំង​ថា​តើ​វា​នឹង​ប៉ះ​ពាល់​ដល់​សេដ្ឋកិច្ចយ៉ាងដូចម្តេចខ្លះ។