ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ កាលពីថ្ងៃព្រហស្បតិ៍ (១២ តុលា) បាន​បន្ត​អាណត្តិ​របស់អ្នករាយការណ៍របស់ខ្លួន ស្តីពីការរំលោភសិទ្ធិក្នុងប្រទេសរុស្ស៊ី រយៈពេល​មួយ​ឆ្នាំ​ទៀត នៅក្នុងការបរាជ័យផ្នែកការទូតលើកទីពីរសម្រាប់ទីក្រុងម៉ូស្គូ ក្នុងរយៈពេលបីថ្ងៃមកនេះ។

ស្ថាប័ន​សិទ្ធិមនុស្សកំពូលរបស់អង្គការសហប្រជាជាតិ បានអនុម័ត​សេចក្ដី​សម្រេច​ដែល​នាំ​មក​ដោយ​ប្រទេស​អឺរ៉ុបមួយចំនួន ក្នុងការបន្តរយៈការងាររបស់អ្នកជំនាញសិទ្ធិមនុស្សប៊ុលហ្គារី លោក​ស្រី Mariana Katzarova រយៈពេលមួយឆ្នាំទៀត នៅក្នុងប្រទេសរុស្ស៊ី។

នៅទីក្រុងហ្សឺណែវ កាលពីថ្ងៃព្រហស្បតិ៍ ស្ថាប័នសិទ្ធិមនុស្សកំពូលរបស់អង្គការសហប្រជាជាតិ បាន​ធ្វើឱ្យមានការប៉ះទង្គិចផ្នែកការទូតមួយទៀតលើប្រទេសរុស្ស៊ី ដោយការ​អនុម័ត​សេចក្ដី​សម្រេច​លើ​អ្នករាយការណ៍ពិសេស ដោយសម្លេងគាំទ្រចំនួន១៨ ទល់នឹងសម្លេងប្រឆាំងចំនួន ៧សំឡេង។

កាលពីខែតុលា ឆ្នាំ២០២២ ក្រុមប្រឹក្សានេះបានសម្រេចថា ខ្លួនត្រូវការ​អ្នក​រាយការណ៍​ពិសេស​ម្នាក់​សម្រាប់​ប្រទេសរុស្ស៊ី ស្របពេលមានការព្រួយបារម្ភអំពីការបង្រ្កាបក្នុងស្រុក ដែលកាន់​តែ​ខ្លាំង​ឡើង​ដោយ​ទីក្រុងម៉ូស្គូ ក្នុងអំឡុងពេលសង្រ្គាមរបស់ខ្លួននៅក្នុងប្រទេសអ៊ុយក្រែន។

សេចក្ដី​សម្រេចដែលបានអនុម័តកាលពីថ្ងៃព្រហស្បតិ៍ បានអំពាវនាវឱ្យទីក្រុងម៉ូស្គូបង្កើត «ទំនាក់​ទំនង​លក្ខណ​ស្ថាបនា និងកិច្ចសហប្រតិបត្តិការពេញលេញ» ជាមួយលោកស្រី Katzarova និង​អនុញ្ញាត​ឱ្យ​មាន​ការចូលដំណើរការបេសកកម្មរបស់លោកស្រី ដោយគ្មានការរារាំង រួមទាំង​ការ​ជួប​ដោយ​សេរី​ជាមួយសង្គមស៊ីវិល និងបុគ្គលដែលកំពុងជាប់ឃុំ ប៉ុន្តែទីក្រុងម៉ូស្គូ បានបដិសេធ​មិន​អនុញ្ញាត​ឱ្យ​លោកស្រីចូលក្នុងប្រទេស ហើយមិនទទួលស្គាល់អាណត្តិរបស់លោកស្រី Katzarova នោះទេ៕