អុីស្រាអែល ៖ កាលពីថ្ងៃសៅរ៍ម្សិលមិញ យោធាអ៊ីស្រាអែល បានចោទប្រកាន់ក្រុមហាម៉ាសថា បានរារាំងជនស៊ីវិលពីការចាកចេញពីតំបន់ភាគខាងជើងតំបន់ហ្គាហ្សា ស្របពេលដែលពួកគេត្រៀមខ្លួនវាយប្រហារតាមជើងគោកលើដែនដីរបស់ប៉ាឡេស្ទីនមួយនេះ ។ 

 អ៊ីស្រាអែល សន្យាថានឹងបំផ្លាញឲ្យសាបសូន្យក្រុមជីវពលហាម៉ាស់ដែលគ្រប់គ្រងតំបន់ហ្គាហ្សា ដើម្បីសងសឹកនឹងការសម្រុកចូលរបស់ពួកគេ ដែលបានវាយប្រហារទូទាំងទីក្រុងជាច្រើនរបស់អ៊ីស្រាអែលកាលពីរយៈពេល ១សប្តាហ៍មុន ដោយបានសម្លាប់មនុស្ស ១.៣០០នាក់ នៅការវាយប្រហារដ៏អាក្រក់បំផុតមកលើជនស៊ីវិលក្នុងប្រវត្តិសាស្រ្តអ៊ីស្រាអែល ។ 

 កាលពីថ្ងៃសុក្រ យោធាអ៊ីស្រាអែល បាននិយាយប្រាប់ប្រជាពលរដ្ឋរស់នៅតំបន់ពាក់កណ្តាលនៅភាគខាងជើងហ្គាហ្សាស្រ្ទីប ដែលរួមទាំងការតាំងលំនៅនិគមធំបំផុតនៅទីក្រុងហ្គាហ្សា ឲ្យផ្លាស់ទីទៅកាន់តំបន់ភាគខាងត្បូងជាបន្ទាន់ ។ 

 ចាប់តាំងពីពេលនោះមក កងកម្លាំងអ៊ីស្រាអែល បានដាក់តំបន់ហ្គាហ្សាដែលគ្រប់គ្រងដោយក្រុមហាម៉ាស់ និងមានពលរដ្ឋរស់នៅ ២,៣លាននាក់ ស្ថិតក្រោមការឡោមព័ទ្ធ ហើយបានវាយប្រហារតាមច្រកអាកាសពុំធ្លាប់ដែលមានកាលពីមុន ។ 

 ក្រុមអាជ្ញាធរតំបន់ហ្គាហ្សា និយាយថា មនុស្សជាង ២.២០០នាក់ ត្រូវបានសម្លាប់ ក្នុងនោះ១ភាគ៤នៃពួកគេ គឺជាកុមារ ហើយមនុស្សជិត ១ម៉ឺននាក់ទៀត បានរងរបួស ៕