តាមអនុសាសន៍ណែនាំដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃ​ព្រះរាជា​ណាចក្រកម្ពុជា ដើម្បីចូលរួមលើកស្ទួយវិស័យព្រះពុទ្ធសាសនា ដែល​ជា​កេរ្តិ៍​តំណែល​របស់​ពុទ្ធ​បរិស័ទ​គោរពប្រតិបត្តិតរៀងមក នាថ្ងៃទី១៥ ខែតុលា ឆ្នាំ២០២៣ ឯកឧត្តម ចាយ បូរិន រដ្ឋ​មន្រ្តីក្រសួងធម្មការ និងសាសនា ព្រមទាំងថ្នាក់ដឹកនាំក្រសួង បាន​សហការ​ជាមួយ​ប្រធាន​មន្ទីរ​ធម្មការ​ខេត្ត ព្រះមេគណខេត្ត និងអាជ្ញាធរពាក់ព័ន្ធ អញ្ជើញចុះពិនិត្យមើលស្ថានភាពទូទៅ នៅ​តាម​ទី​អារាមចំនួន១៥វត្ត នៃខេត្តកំពង់ឆ្នាំង និងខេត្តពោធិ៍សាត់។

ឯកឧត្តម ចាយ បូរិន បានថ្លែងថា ព្រះពុទ្ធសាសនាបានដើរតួនាទីយ៉ាងសំខាន់ ក្នុងការអប់រំ និង​ចូល​រួម​ចំណែកអភិវឌ្ឍសង្គមជាតិជាមួយរាជរដ្ឋាភិបាលកម្ពុជា ជំរុញឱ្យ​ប្រជាពលរដ្ឋ​ប្រកាន់​ភ្ជាប់​នូវ​សីលធម៌ ចរិយាធម៌ និងគុណធម៌ល្អប្រសើរក្នុងការរស់នៅ។

ឯកឧត្តម រដ្ឋមន្រ្តីក្រសួងធម្មការនិងសាសនា ក៏បានរំលឹកដល់ប្រជាពុទ្ធបរិស័ទ និង​បងប្អូន​ប្រជាពលរដ្ឋ​នៅ​ក្នុងមូលដ្ឋានស្រុករលាប្អៀរ ខេត្តកំពង់ឆ្នាំង និងស្រុកក្រវាញ ខេត្តពោធិ៍សាត់ ត្រូវ​ប្រុង​ប្រយ័ត្ន​យកចិត្តទុកដាក់ថែទាំសុខភាព ពោលគឺហូបស្អាត ផឹកស្អាត និងរស់នៅស្អាត ដើម្បី​បង្ការ​នូវ​ផលលំបាកផ្សេងៗ។ ពិសេសនារដូវទឹកស្រកនេះត្រូវខិតខំបង្កបង្កើនផល និង​បង្កើន​មុខ​របរ​កស៊ី ដើម្បីលើកកម្ពស់ជីវភាពរស់នៅក្នុងក្រុមគ្រួសារ។

នៅក្នុងឱកាសប្រកបដោយបីតិសោមនស្សជ្រះថ្លានេះដែរ ឯកឧត្តម ចាយ បូរិន បាន​ប្រគេន​នូវ​ទេយ្យ​ទាន ដែលជាសទ្ធាជ្រះថ្លារបស់សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដល់វត្តចំនួន១៥ ក្នុងនោះនៅខេត្តកំពង់ឆ្នាំងចំនួន៥វត្ត និង​ខេត្តពោធិ៍សាត់​ចំនួន​១០​វត្ត ដោយវត្តទាំង១៥ប្រគេនអង្ករសរុបចំនួន ៧៥០០គីឡូក្រាម មី៣៧៥កេស និង​បច្ច័យ ដើម្បីចូលរួមចំណែកទ្រទ្រង់វិស័យព្រះពុទ្ធសាសនានៅក្នុងខេត្តទាំងពីរ៕ អត្ថបទ រដ្ឋា