បាល់ទាត់៖ ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិ អូឡាំពិកកម្ពុជាបានឲ្យដឹងថា ការបំពាក់កៅអីកីឡដ្ឋានធំ នៃពហុកីឡដ្ឋានជាតិមរតកតេជោគឺសម្រេចបាន ៨០% ហើយ ខណៈនៅសល់ ២០% ទៀតគ្រោងនឹងបញ្ចប់ក្នុងពេលឆាប់ៗខាងមុខ។
ការបញ្ជាក់របស់រដ្ឋលេខាធិការក្រសួងទេសចរណ៍នេះ បន្ទាប់ពីមានកិច្ចប្រជុំពិសេសរវាងឯកឧត្ដមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មការអន្ដរក្រសួងត្រួតពិនិត្យបច្ចេកទេស នៃការសាងសង់ពហុកីឡដ្ឋានជាតិមរតកតេជោ និងឯកឧត្ដម វ៉ូ គួឈ័ន ទីប្រឹក្សាសេដ្ឋកិច្ច និងពាណិជ្ជកម្មនៃស្ថានទូតចិនប្រចាំនៅកម្ពុជា ដើម្បីស្ដាប់សេចក្ដីរាយការណ៍អំពីវឌ្ឍនភាព នៃការសាងសង់ពហុកីឡដ្ឋានជាតិមរតកតេជោកាលពីថ្មីៗ។ ឯកឧត្ដម វ៉ាត់ ចំរើន បានបន្ថែមថា តាមការអះអាងរបស់ក្រុមហ៊ុនសាងសង់ចិន សំណង់កីឡដ្ឋានធំទាំងអស់នៃពហុកីឡដ្ឋានជាតិមរតកតេជោបានរួចរាល់អស់ហើយ។ ចំណែកការបំពាក់កៅអីអង្គុយសរុប ៦ម៉ឺនកៅអីក៏សម្រេចបាន ៨០% ដែរ ហើយនៅសល់ ២០% ទៀតនឹងត្រូវបញ្ចប់ក្នុងពេលឆាប់ៗ។ រីឯស្មៅវិញបានលូតលាស់ល្អ និងមានគុណភាពខ្ពស់តាមការចង់បាន ពោលគឺជាទីលានបាល់ទាត់ស្មៅធម្មជាតិស្តង់ដារអន្តរជាតិ សម្រាប់ត្រៀមស្វាគមន៍ការប្រកួតកីឡាស៊ីហ្គេមឆ្នាំ២០២៣ នៅកម្ពុជា។
ដោយឡែកពាក់ព័ន្ធការសេសសល់វិញ ត្រូវបានភាគីទាំងពីរជជែកយ៉ាងលម្អិត ពិសេសលើការសាងសង់ផ្ទាំងនិមិត្តរូបសំណង់ នៃពហុកីឡដ្ឋានជាតិមរតកតេជោ ដែលជាជំនួយឥតសំណង់របស់សាធារណរដ្ឋប្រជាមានិតចិន ដូចជាការសាងសង់នូវស្លាកសញ្ញានៃការថ្លែងអំណរគុណ ស្លាកសញ្ញាចំណងមិត្តភាព ស្លាកសញ្ញានៃប្រវត្តិ និងដំណើរការសាងសង់ ក៏ដូចជាស្លាកសញ្ញា និងជានិមិត្តរូបផ្សេងទៀត ដែលភាគីទាំងពីរបានឯកភាពគ្នានឹងធ្វើក្នុងពេលឆាប់ៗ។ នេះបើតាមការបញ្ជាក់បន្ថែមរបស់ឯកឧត្ដម វ៉ាត់ ចំរើន។ គួរដឹងថា កីឡដ្ឋានធំនៃពហុកីឡដ្ឋានជាតិមរតកតេជោ បានបើកការដ្ឋានសាងសង់កាលពីថ្ងៃទី០៤ ខែមេសា ឆ្នាំ២០១៧ ក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ដែលជាជំនួយឥតសំណងរបស់រដ្ឋាភិបាលសាធារណរដ្ឋប្រជាមានិតចិន និងប្រជាជនចិនក្នុងទំហំទឹកប្រាក់ប្រមាណ ១៦០លានដុល្លារ។ សមិទ្ធផលដ៏អស្ចារ្យនេះអាចផ្ទុកអ្នកទស្សនាបានប្រមាណ ៦ម៉ឺននាក់នេះ ដើម្បីត្រៀមស្វាគមន៍ព្រឹត្តិការណ៍ប្រវត្តិសាស្ត្រកីឡាស៊ីហ្គេមលើកទី៣២ ឆ្នាំ២០២៣ នៅកម្ពុជា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
