មីយ៉ាន់ម៉ា៖ ក្រុមអ្នកតវ៉ាប្រឆាំងរដ្ឋប្រហាររាប់សិបនាក់ បានជួបជុំគ្នាតាមគោលដៅដែលបានណាត់ កាលពីថ្ងៃព្រហស្បតិ៍នៅក្នុងទីក្រុងយ៉ាងហ្គូ ដែលជាទីក្រុងមានប្រជាជនច្រើនជាងគេបំផុតរបស់សហភាពមីយ៉ាន់ម៉ា។
ពួកគេបានលើកម្រាមដៃ៣ ខណៈកំពុងស្រែកពាក្យស្លោកស្រុះគ្នាខ្លាំងៗ គាំទ្រលទ្ធិប្រជាធិបតេយ្យ។ ការប្រឆាំងនឹងរបបដឹកនាំរបស់យោធាសហភាពមីយ៉ាន់ម៉ា នៅតែរីកធំរយៈពេលជាង៤ខែមកនេះបន្ទាប់ពីមេដឹកនាំស៊ីវិល Aung San Suu Kyi ត្រូវបានទម្លាក់ចេញពីតំណែង នៅក្នុងរដ្ឋប្រហារយោធាកាលពីថ្ងៃទី១ ខែកុម្ភៈកន្លងទៅនេះ។ ការប្រមូលផ្ដុំគ្នាតាមគោលដៅណាត់នឹងរំសាយភ្លាមៗ ត្រូវបានធ្វើឡើងជំនួសឲ្យការធ្វើបាតុកម្មទ្រង់ទ្រាយធំៗ ក្នុងរយៈកាល ៤ខែកន្លងមកនេះ ដោយសារការឆ្លើយតបយ៉ាងសាហាវពីកងកម្លាំងសន្តិសុខ។
យោងតាមសមាគមជួយអ្នកទោសនយោបាយអ្នកតវ៉ាចំនួន ៨៤២នាក់ និងអ្នកឈរមើលហេតុការណ៍ត្រូវបានសម្លាប់ដោយកងកម្លាំងសន្តិសុខ ចាប់តាំងពីប្រទេសនេះគ្រប់គ្រងដោយយោធា។ សហគមន៍ដែលនៅតែបន្តតាមដានការចាប់ខ្លួន និងស្លាប់ចាប់តាំងពីគ្រប់គ្រងដោយយោធានិយាយថា មនុស្សជាង ៤,៤០០នាក់ត្រូវបានឃុំខ្លួន រួមទាំងមនុស្សចំនួន ១៣៣នាក់ត្រូវបានកាត់ទោសរួចទៅហើយ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
