មន្ត្រីសុខាភិបាល នៃរដ្ឋបាលរាជធានីភ្នំពេញ នាព្រឹកថ្ងៃទី១៧ ខែតុលា ឆ្នាំ២០២៣នេះ បាន​បន្ត​យុទ្ធនាការ​ចាក់វ៉ាក់សាំងការពារជំងឺមហារីកមាត់ស្បូនជូនកុមារីអាយុ៩ឆ្នាំ ដោយឥតគិតថ្លៃ នៅ​សាលា​បឋមសិក្សាទួលគោក តាមភូមិ និងមណ្ឌលសុខភាព។

បើតាមលោក គិត សេដ្ឋា អនុប្រធានការិយាល័យសុខាភិបាលសុ្រកប្រតិបតិ្តចតុមុខ មនី្ទរ​សុខាភិបាល នៃ​រដ្ឋបាលរាជធានីភ្នំពេញ បានឲ្យដឹងថា ក្រុមការងារគ្រូពេទ្យចំនួន៧រូប បាន​ចុះ​មក​ផ្តល់​វ៉ាក់សាំងការពារជំងឺមហារីកមាត់ស្បូនជូនកុមារី ដោយឥតគិតថ្លៃ នៅ​ក្នុង​សាលា​បឋម​សិក្សា​ទួល​គោក ពេញមួយថ្ងៃ(ព្រឹក-រសៀល)។ សូមជម្រាបជូនមាតា បិតា អាណាព្យាបាលថា ការ​ផ្តល់​វ៉ាក់សាំង​ជូន​កុមារីនេះ ក្នុងគោលបំណងដើម្បីការពារជំងឺមហារីកមាត់ស្បូន ព្រោះថា​ជំងឺ​មហារីក​មាត់​ស្បូន ជានិច្ចកាលត្រូវបានគេប្រសិទ្ធនាមថាជា ឃាតកលាក់មុខ ហើយ​ក៏​ជាជំ​ងឺ​មួយ​ដែល​អាច​ការ​ពារ​បានទាំងស្រុងផងដែរ ដោយសារថ្នាំបង្ការ។ វីរុសមហារីកមាត់ស្បូន បង្កឲ្យ​កើត​ជំងឺ​មហា​រីក​មាត់​ស្បូន ហើយជំងឺនេះជាមូលហេតុចម្បងទីបួន នៃការស្លាប់របស់ស្រី្ត ដោយជំងឺ​មហារីក​នៅ​ទូទាំង​ពិភពលោក ហើយភាគច្រើនកើតនៅក្នុងប្រទេស ដែលមានប្រាក់ចំណូលទាប និងមធ្យម។

កុមារី មានអាយុ៩ឆ្នាំ កំពុងសិក្សានៅសាលាបឋមសិក្សាទួលគោក បានបង្ហាញកី្តរីករាយ ដោយ​ទទួលបានការចាក់វ៉ាក់សាំងការពារជំងឺមហារីកមាត់ស្បូន ដោយឥតគិតថ្លៃ ពី​ក្រុម​ការងារ​គ្រូពេទ្យ​ នៃ​ការិយាល័យសុខាភិបាលសុ្រកប្រតិបតិ្តចតុមុខ ដើម្បីលុបបំបាត់ជំងឺដ៏កាចសាហាវនេះ។

សូមបញ្ជាក់ផងដែរថា ថ្នាំបង្ការជំងឺមហារីកមាត់ស្បូន គឺក្រសួងសុខាភិបាល នៃ​ព្រះរា​ជា​ណា​ចក្រ​កម្ពុជា​ បានប្រកាសដាក់បញ្ចូលក្នុងកម្មវិធីជាតិផ្តល់ថ្នាំបង្ការ ដើម្បីសង្រ្គោះជីវិតស្រី្ត ពី​សេចកី្ត​ស្លាប់​ដែល​បណ្តាល​មកពីជំងឺមហារីកមាត់ស្បូន កាលពីថ្ងៃទី៥ ខែតុលា ឆ្នាំ២០២៣។ ឥលូវនេះ​ប្រទេស​កម្ពុជា បានចូលរួមជាមួយប្រទេសចំនួន១៣៦ផ្សេងទៀត ដែលបានដាក់​បញ្ចូល​ថ្នាំ​បង្ការ​ជំងឺ​មហា​រីមាត់ស្បូនទៅក្នុងកម្មវិធីជាតិផ្តល់ថ្នាំបង្ការ៕អត្ថបទ៖ រដ្ឋា