ដោយសារតែស្ថានភាពទឹកនៅតែបន្តហូរមកពីផ្នែកខាងលើខ្លាំង ក្រុមមន្ត្រីជំនាញ បានបើកទ្វារទំនប់៧មករា ប្រមាណ២ម៉ែត្រ ដើម្បីឱ្យទឹកហូរទៅផ្នែកខាងក្រោម ចូលទៅតាមសណ្តរស្ទឹងព្រែកត្នោត ដែលធ្វើឱ្យស្ថានភាពទឹកស្ទឹងបន្តហក់ឡើងខ្ពស់ ដល់កម្រិតត្រូវប្រុងប្រយ័ត្នខ្ពស់បំផុត។
មន្ត្រីដែលប្រចាំការ នៅទំបន់៧មករា បានប្រាប់ BTV នាព្រឹកថ្ងៃទី១៧ ខែតុលា ឆ្នាំ២០២៣នេះឱ្យដឹងថា ស្ថានភាពទឹក មានការហក់ឡើងជាង១ម៉ែត្រ បើធៀបទៅថ្ងៃទី១៦ ម្សិលមិញ ដោយម្សិលមិញទឹកមានកម្រិតកម្ពស់ត្រឹមតែ ៥,៤០ម៉ែត្រប៉ុណ្ណោះ ប៉ុន្តែនៅថ្ងៃនេះ ទឹកបានហក់ឡើងដល់ ៦,៦០ម៉ែត្រ ។ មន្ត្រីដដែលបានបន្ត ជាទូទៅ នៅពេលកម្រិតកម្ពស់ទឹកហក់ឡើងដល់ ៧ម៉ែត្រ ឬហៅថាស្មើរជើងទំនប់ គឺវាបានឡើងដល់ចំណុចមួយដែលត្រូវប្រកាសឱ្យពលរដ្ឋត្រៀមខ្លួន និងប្រុងប្រយ័ត្នឱ្យបានខ្ពស់បំផុត ហើយស្ថានភាពជាក់ស្តែងនៅព្រឹកនេះ គឺខ្វះតែ ៤តឹកទៀតប៉ុណ្ណោះ នឹងឡើងដល់កម្រិតត្រូវប្រកាសឱ្យពលរដ្ឋផ្នែកខាងក្រោយត្រូវប្រុងប្រយ័ត្នហើយ ។
ប្រភពដដែលបានបន្តថា ស្ថានភាពនៅថ្ងៃនេះ ក្រុមជំនាញ បានបើកទ្វារទឹក២ម៉ែត្រ ដើម្បីឱ្យទឹកហូរធ្លាក់ទៅទ្វារផ្នែកខាងក្រោម ព្រោះដោយសារទឹកបានហូរធ្លាក់ពីផ្នែកខាងលើមកខ្លាំង ពិសេសហូរមកពីខេត្តកំពង់ស្ពឺ ដោយជំនន់ទឹកភ្លៀង ។
ពលរដ្ឋរស់នៅក្បែរតំបន់ស្ទឹងព្រែកត្នោត បានប្រាប់ឱ្យដឹងថា ស្ថានភាពទឹកស្ទឹង មានការហក់ឡើងខ្លាំងក្នុងរយៈពេលកន្លងមកនេះ ហើយ ការហក់ឡើងនេះ បានធ្វើឱ្យពួកគាត់បានត្រៀមជាស្រេច ក្នុងករណីប្រសិនបើ ស្ថានភាពទឹកហក់ឡើងរហូតកើតជាការជន់លិចចូលដល់ភូមិ ឬលំនៅឋានរបស់ពួកគាត់ ។
មន្ត្រីនគរបាលមូលដ្ឋាន បានប្រាប់ BTV ឱ្យដឹងផងដែរថា ទន្ទឹមនឹងស្ថានភាពទឹកស្ទឹងព្រែកត្នោតមានការហក់ឡើងនេះដែរ សមត្ថកិច្ច និងអាជ្ញាធរភូមិសង្កាត់ បានចុះប្រាប់ដល់ពលរដ្ឋ ដែលមានទីលំនៅប្របមាត់ស្ទឹង និងលំនៅឋានងាយរងគ្រោះ ឱ្យត្រៀមខ្លួនឱ្យបានមុនជាស្រេច ដោយត្រូវរៀបចំនូវសម្ភារៈ និងអ៊ីវ៉ាន់ ដាក់ទៅទីទួលមានសុវត្ថិភាពឱ្យហើយ ព្រោះគ្រោះធម្មជាតិនេះ អាចកើតឡើងបានដោយមិនទៀងទាត់ពេលវេលានោះទេ ។
សូមបញ្ជាក់ថា ទឹកសណ្តរស្ទឹងព្រែកត្នោត តែងមានការហក់ឡើងជាប្រចាំនៅរៀងរាល់រដូវវស្សាចូលមកដល់ គ្រាន់តែឆ្នាំខ្លះហក់ឡើងតិចតួច មិនមិនបង្កផលប៉ះពាល់ តែឆ្នាំខ្លះក៏មានការហក់ឡើងខ្លាំង បង្កជាការជន់លិចដល់លំនៅឋាន និងភូមិមួយចំនួនរបស់ពលរដ្ឋ នៅប្របមាត់ស្ទឹង និងក្បែរស្ទឹងផងដែរ ។ ហើយក្នុងមួយរយះប៉ុន្មានថ្ងៃក្រោយមកនេះ ដោយសារស្ថានភាពអាកាសធាតុ មានភ្លៀងធ្លាក់ខ្លាំង ទើបធ្វើឱ្យស្ថានភាពសណ្តរស្ទឹងព្រែកត្នោតមានការហក់ឡើងខ្លាំង តែម្តង ៕ អត្ថបទ៖ លីហេង
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
